Një gropë masive është hapur në qendër të Bankokut, duke përpirë një pjesë të rrugës dhe duke shkaktuar kaos në qytet. Shembja ndodhi në rrugën Samsen, pranë Spitalit Vajira, duke krijuar një krater me përmasa rreth 50 metra thellësi dhe afro 900 metra katrorë sipërfaqe.
Gropa shkatërroi asfaltin, rrëzoi shtylla elektrike dhe çau tubacione uji, duke lënë zonën pa energji elektrike dhe furnizim me ujë. Të paktën tre automjete u përpinë por fatmirësisht zyrtarët konfirmuan se nuk ka pasur viktima.
Hetimet e para tregojnë se shembja lidhet me lëvizjen e dheut nga punimet nëntokësore të metrosë, ndoshta e rënduar edhe nga dëmtimi ose rrjedhja e tubave të ujit.
Ekipet e emergjencës po punojnë për të stabilizuar terrenin dhe për të parandaluar shembje të tjera, ndërkohë që qarkullimi është devijuar nga zona e prekur.
