Presidenti i Teutës, Edmond Hasanbelliu u shfaq tepër i lumtur, pas triumfit 3-0 që skuadra e tij arriti në Superkupë ndaj Vllaznisë.
Në një prononcim të dhënë për mediat Hasanbelliu ndër të tjera zbuloi se ditën e hënë Teutës do t’i bashkohet edhe një sulmues, i cili pritet të jetë dhe goditja e fundit në këtë merkato vere.
“Pak a shumë e prisnim këtë fitore. Skuadra ka bërë ndeshje të mira, edhe pse u eliminuam nga kupat e Europës.
Mendova që do ta fitonim Superkupën, pasi Vllaznia ishte skuadër në dukje e re. Ndaj prisja që të fitonim ne. Dua të falënderoj çunat, që bënë ndeshje të bukur dhe e merituan këtë trofe.
Ne e merituam kampionatin. Ata mund të mendojnë që jo… Ne kemi problemet tona, luanim me dy mbrojtës të rinj qendre. Kemi një sulmues që do të na vijë të hënën, do ua japim mediave edhe emrin kur të mbyllet.
Objektivi është titulli kampion, dihet. Normalisht do jetë shumë e vështirë, pasi janë 7 skuadra pretendente. Ne do mundohemi të bëjmë maksimumin”, deklaroi numri 1 i durrsakëve.
