Policia e Durrësit ka vënë në pranga një tjetër shtetas të shpallur në kërkim ndërkombëtar, si rezultat i operacionit të koduar “The Wanted”.
I arrestuari është shtetasi B.Gerguri, 39 vjeç, banues në Durrës, i cili kërkohej nga autoritetet italiane për veprimtari kriminale në fushën e narkotikëve.
Sipas njoftimit zyrtar, Gjykata e Apelit e Milanos e ka dënuar në vitin 2023 me 5 vjet e 2 muaj burg, për veprën penale “Trafikim i lëndëve narkotike”, parashikuar nga Kodi Penal italian.
Njoftimi i policisë;
Durrës/Finalizohet operacioni policor i koduar “The Wanted”.
Kapet një tjetër shtetas i shpallur në kërkim ndërkombëtar për trafikim të lëndëve narkotike.
Në vijim të operacioneve të njëpasnjëshme për lokalizimin dhe kapjen e shtetasve të shpallur në kërkim ndërkombëtar, bazuar dhe në informacionet e siguruara në rrugë operative, shërbimet e Forcës së Posaçme Operacionale dhe të Seksionit për Hetimin e Narkotikëve, në bashkëpunim me shërbimet e Sektorit të Qarkullimit Rrugor, të Drejtorisë Vendore të Policisë Durrës, në kuadër të operacionit policor të koduar “The Wanted”, lokalizuan, kapën dhe arrestuan me qëllim ekstradimin në Itali, shtetasin:
B.Gerguri, 39 vjeç, banues në Durrës.
Ky shtetas ishte shpallur në kërkim ndërkombëtar, pasi Gjykata e Apelit e Milanos, Itali, në vitin 2023, e ka dënuar me 5 vjet e 2 muaj burgim, për veprën penale “Trafikim i lëndëve narkotike”, parashikuar nga Kodi Penal italian.
Vijojnë procedurat për ekstradimin e 39-vjeçarit, në Itali.
