Pothuajse një vit më parë, në rrjetet sociale u publikua video e dy shqiptarëve në Itali të cilët filmonin lagjen, por një qytetar italian mendoi se ata po shikonin shtëpitë për t’i vjedhur.

Njëri prej tyre thotë se nuk kishte asnjë shqetësim të tillë, dhe përdor termin “shëtito” për të treguar se thjesht po shëtisnin dhe po filmojnë rrugët.

Por nga termi “shëtito”, ky shqiptar u bë hit në rrjetet sociale. Ai është Besmir Balla, i cili sot ka ardhur në studion e “Ka një mesazh për ty” në emisionin E Diela Shqiptare në Tv Klan.

Besmiri ka treguar të gjithë historinë çfarë ndodhi në Itali, përse po filmonin në lagje dhe si u bë popullor në rrjetet sociale.

“Unë quhem Besmir Balla. Jam i martuar, kam 2 fëmijë si engjëj i kam. Vërtetë në Itali kam shkuar për të punuar për të mbajtur familjen. Nuk kam shkuar për të bërë video apo si e ka marrë gjithë Shqipëria, dhe kjo pak a shumë ka ndikuar tek familja ime. Kjo video ka qenë në vitin që lamë pas, në Prill. Ne punonim në ndërtim. Kolegu im bënte një video për t’ia çuar familjes së vetë se kishte dalë, po bënte një video dhe ne kishim ecur shumë”.

Ardit Gjebrea: Pra ju bënit video me shtëpi të bukura dhe ja u çonit familjeve…

Besmiri: Jo shtëpi të bukura. Ne kishim ecur gjatë gjithë rrugës për të parë ambientin, rrugët, ishte pastërtia, rregulli…

Ardit Gjebrea: Domethënë, çdo gjë që ndodhte në Itali ju e xhironit dhe thonit sa bukur është këtu, e shikoni sa pastër, ja sa të bukura janë shtëpitë, ja rruga, ja shatërvani.

Besmiri: Po, edhe donte t’ia çonte ai vetë familjes së vetë. Edhe e morëm me sportivitet. Kur vij në darkë në shtëpi, na thotë pronari që ju kemi parë në televizor në një DJ italian. Ky personi që na bëri videon ishte vetëm, ishte me makinë dhe ne e pamë, i thashë kolegut tim mos e mbyll videon po mbaje se mos na marrin për hajdutë. Sepse 3 muaj kishim që kishim hyrë në Itali dhe vërtetë nuk e dija italishten, se në shtëpi me shqiptarë, në punë me shqiptarë, xhiron me shqiptarë, por për të mos hapur probleme, i thashë mbaje telefonin. Po vinte me makinë ai zotëria, kaluam afër shtëpisë së atij me telefon edhe thotë përse e filmuat shtëpinë? Edhe e kishte telefonin në dorë vetë ai. Për të mos e lëmë vetëm, m’u kujtua “tutti” edhe përputha “shëtito”. Kjo u bë, “shëtito”, si batutë humori. Por ama ishte pjesa që po bëjmë xhiro, nuk ka lidhje me hajdutllikun. Unë jam një familjar i rregullt. U bë video në Prill, shoku im erdhi në Shqipëri kurse unë erdha në fund të Korrikut, sepse po më thoshte hajde në Shqipëri, të kërkojnë gazetat, të kërkojnë studiot. Unë nuk jam tip që dal shumë nëpër këto emisione apo nëpër video. Nuk erdha se më vriste pak ndërgjegjia. Shkoj ky muhabet, u bë e madhe, e mora me sportivitet sepse nuk do merrem me lloj-lloj njerëzish.

Ardit Gjebrea: Cili ishte reagimi i njerëzve?

Besmiri: Reagimi i njerëzve gjithmonë ka qenë për punë hajdutlliku. Domethënë “shëtito” filmojmë shtëpira ditën dhe vjedhim natën. Por jo nuk është e vertetë. Ai djali ka dy fëmijë, është familjar i rregullt sikur jam edhe unë, shikojmë punën tonë, punojmë me djersën e ballit, nuk i biem në qafë askujt. Ngaqë s’kemi krah, nuk i kam hyrë kësaj pune për të marrë një avokat për dëm moral të personalitetit, dëm familjar.   

Besmiri tregoi historinë pas videos, për të cilën ai shprehet se ndihet tejet i sulmuar pasi asgjë nuk është ashtu siç duket, madje është keqkuptuar sepse arsyeja e vetme për të cilën ai i është drejtuar shtetit fqinj ishte një punë e ndershme për të rritur të ardhurat e familjes.

Megjithatë, shqetësimi i tij nuk është vetja, por familja e tij që është ndikuar nga kjo histori, sidomos bashkëshortja. Pas 10 vitesh martesë, ajo ka bërë ditën e sotme një kërkesë për divorc, pas 1 viti e gjysmë që është larguar nga shtëpia dhe u shpërngul te familja e saj. Shkaku i kërkesës ishin problemet financiare dhe ekonomike midis tyre, por Besmiri mendon se çdo gjë mund të kapërcehet dhe ai është i gatshëm të punojë për të mos i munguar asgjë familjes së tij.

Besmir Balla: Nga dashuria që kam për të, e dua shumë, e dua familjen, s’dua të shkatërrohet për arsye sepse Zoti sot të ul e të ngre prape dhe kam besim që do ia dal. E ka ndikuar pak pjesa me qera, e ka ndikuar po nga fillimi do fillojmë ne sepse shteti nuk të ndihmon. Kam shkuar në bashki, kërkoja shtëpi sociale, ta paguaja, sepse në Durrës ku rri unë, në plazh, është sezonal. Të premtojnë, thonë se do iu mbaj dimër-verë, por më pas të nxjerrin jashtë, sikur jam unë aktualisht prapë. Do kërkoj prapë shtëpi, por kur jam vetëm nuk të jep njeri hyrje se duan familjarë. Unë jam shumë familjar i rregullt, kam një nuse shumë familjare, por e pa pasura ndonjëherë të bën të shkojë deri këtu. Kjo është pse unë luftoj që t’i kërkoj falje t’i them që e dua më shumë dhe do bëj më shumë të pamundurën që asaj të mos i mungojë gjë.

Ardit Gjebrea: Pasi ke provuar në disa mënyra…

Besmir Balla: Në shumë mënyra, ka bërë një denoncim prapë në Durrës, mori një urdhër mbrojtjeje për 3 muaj për dhunë psikologjike e fizike kur unë nuk jam i dhunshëm, nuk jam. Jam ndoshta nevrik, e pranoj, jam për të drejtën e familjes, për mirë, por ndoshta ndonjëherë kur ngre zërin është edhe ndopak acaruese. Edhe vetë e kuptoj që e shoh në moment dhe them “prit njëherë, ku po shkoj?”, por nuk e kam dashur t’i bëj keq, as nuk dua t’ia bëj sido të shkojnë rrethanat. Nëse ka vendosur mos të vijë të jetojë me mua, nuk më do më, unë ia them këtu publikisht që vërtetë unë e dua me gjithë shpirt. Nuk e do njeri sa e dua unë atë, as fëmijët e mi nuk do i dojë njeri sa i dua unë, sa më dhemb mua shpirti nuk i dhemb njeriu. Pavarësisht rrethanave, dikush mund t’i thotë që “hajde se ke një shtëpi” apo ka dy lekë më tepër, nuk është shtëpia gjithçka, nuk është leku gjithçka, familja është gjithçka. Nuk shkatërrohet familja për hiçgjë. /tvklan.al