Nuk është hera e parë që “Mona Lisa” e Leonardo da Vinçit bie pre e sulmeve të ndryshme. Më e famshmja mbetet vjedhja e Vincenzo Peruggia-s në 1911-n, i cili e mbajti plot 28 muaj të varur në kuzhinë përpara se të përpiqej ta rishiste atë tek një tregtar antikuaresh në Firence, i cili njohu origjinalitetin e saj. Peruggia u arrestua dhe u dënua me një vit burg. Në vitin 1956 po ashtu një grua ruse, protestoi për mosmarrjen e nënshtetësisë franceze duke sulmuar me acid kryeveprën e Rilindjes evropiane.
Së fundmi, një tjetër incident është shënuar në muzeun e Luvrit. Një djalë, i maskuar si grua e paralizuar, arriti të çante turmën e madhe të turistëve dhe t’i gjuante pikturës së famshme me tortë. “Mendoni për Tokën, ka njerëz që po e shkatërrojnë. Mendoni për këtë. Artistët ju thonë ‘Mendoni për Tokën.’ Prandaj e bëra atë. Mendoni për planetin!”-u shpreh ai, ndërsa e ndaluan forcat e sigurisë.
Pamjet dhe videot që kanë qarkulluar në rrjetet sociale nuk tregojnë momentin në të cilin personi sulmon pikturën, por vetëm xhamin mbrojtës të njollosur tashmë me krem të bardhë dhe një nga gardianët i cili tenton ta pastrojë.
