Një shqiptar është dënuar me 12 vite e gjashtë muaj burg nga drejtësia greke për vjedhjen e rreth 550 mijë eurove të kryetarit të Bashkisë së Zakynthos, Nikitas Aretakis.
31-vjeçari u dënua me 21 vjet burg nga gjykata e shkallës së parë, por seanca e shkurtuar bëri që shqiptarit t’i ulej dënimi.
Gjatë procesit, dëshmuan rreth 40 dëshmitarë, ndërsa të akuzuarit mohuan çdo përfshirje në çështje.
Incidenti, i cili tronditi komunitetin lokal të Zakynthos, ndodhi më 19 prill 2016. Sipas asaj, që kryetari aktual i bashkisë, Nikitas Aretakis, dëshmoi për autoritetet e policisë, ai ishte duke ecur në trotuar pranë kishës, në qendër të qytetit, kur një i huaj vrapoi drejt tij.
Ai tha se autori i vjedhjes nuk e kishte mbuluar fytyrën, duke e shtyrë dhe më pas i marrë valixhen prej lëkure me rreth 550 mijë euro, të cilat ishin të destinuara për tu depozituara në bankë.
Drejtësia ka shpallur fajtor edhe një punonjës policie, i cili planifikoi grabitjen nga ana e shqiptarit.
Policia që hetoi çështjen më në fund arriti të gjejë autorin e krimit, pasi ndaj tij ishte lëshuar një tjetër urdhër arresti për një rast tjetër të grabitjes dhe dëmtimit të thjeshtë trupor.
