Një 64-vjeçar ka rënë në prangat e policisë së Shkodrës, pasi akuzohet se i vuri flakën një sipërfaqeje toke dhe dogji pemë, një stallë bagëtish dhe disa koshere bletësh. Burime zyrtare nga policia bënë me dije se pas hekurave ra shtetasi me inicialet M. Gj., banues në fshatin Mali i Gjymtit.
NJOFTIMI I POLICISE
Policia identifikon dhe vë në pranga një shtetas të dyshuar për zjarrvënie në fshatin Pentar. Në vijim të punës hetimore për identifikimin dhe kapjen e autorëve të zjarrvënieve, si rezultat i informacioneve dhe provave të siguruara nga Komisariati i Policisë Shkodër, u bënë identifikimi dhe ndalimi i shtetasit:
-M. Gj., 64 vjeç, banues në fshatin Mali i Gjymtit.
Ky shtetas dyshohet se ka ndezur zjarr në një sipërfaqe toke në fshatin Pentar dhe nga përhapja e flakëve janë djegur një sipërfaqe toke e mbjellë me pemë frutore, një stallë bagëtish dhe disa koshere bletësh.
Drejtoria Vendore e Policisë Shkodër apelon për të gjithë banorët dhe në veçanti për ata që kanë në përdorim sipërfaqe kullosore, që në asnjë rast të mos shkaktojnë zjarrvënie, pasi do të përballen me ligjin. Policia fton qytetarët që të denoncojnë në numrin 112, për çdo rast të zjarrvënies apo të paligjshmërisë në tërësi, duke iu garantuar anonimat dhe reagim të shpejtë e të paanshëm.
