Imami: PD mbajti peshën e LSI më 21 janar, humbëm se u treguam luajalë me ta

Ministri i Mbrojtjes flet për 23 qershorin dhe qeverinë “Rama”Imami: 21 janari ishte  i LSI, humbëm sepse u treguam luajalë me ta.
“Rotacioni pas tetë vitesh është krejtësisht normal, por PS-ja fitoi vetëm gjysmë për qind më shumë”Imami për zgjedhjet në parti: Nuk është momenti për të menduar për karrierën individuale.“Rama kryebashkiak i përgjithshëm, Kodheli me eksperiencë”

Ministri i Mbrojtjes, Arben Imami, rendit arsyet e humbjes së Partisë Demokratike në zgjedhjet e 23 qershorit. Në një intervistë për gazetën “Panorama” ai thotë se PD-ja u tregua luajale ndaj ish-aleates së saj LSI-së në fushatën elektorale, çka ndikoi dukshëm në rezultatin e zgjedhjeve. 

Sipas tij, partia e Ilir Metës u tregua inteligjente kur u tha votuesve se do të jetë në qeveri, pavarësisht faktit se kush prej partive të mëdha do t’i fitore zgjedhjet. Imami flet gjithashtu edhe për përbërjen e kabinetit të qeverisë së Edi Ramës dhe zgjedhjet në Partinë Demokratike. “Ishte procesi më i mirë për zgjedhjen e kryetarit. Në një moment që jemi të gjithë përgjegjës për zgjedhjet, e vetmja rrugë është për t’iu drejtuar anëtarësisë. Besoj se përfshirja sa më e gjerë e anëtarësisë së partisë do t’i shërbejë konstituimit të kësaj partie për të ballafaquar rolin e opozitës dhe zgjedhjet e ardhshme”. 

PD-ja humbi zgjedhjet e 23 qershorit, që shpesh është krahasuar me rezultatin e vitit 1997. Cilat ishin arsyet që PD i humbi zgjedhjet dhe doli në opozitë pas 8 vitesh?

Sigurisht që ka gabime dhe përgjegjësi të të gjithëve. Në fakt, kryetari i partisë, dhe ashtu i takonte, ishte i pari që mori përsipër përgjegjësinë e rezultatit të zgjedhjeve. Kjo na bën të fillojmë të mendojmë përse rezultati ishte i paparashikueshëm në perceptimin publik deri pak javë para zgjedhjeve dhe të kuptojmë se çfarë ka ndodhur në atë copë kohe. Çfarë na treguan këto zgjedhje? Na treguan që opozita kundër qeverisjes sonë në katër vjet ishte joefektive për shkak se nëse zgjedhjet do të kishin dhënë një fitore të PS-së, do ishte e qartë që qeverisja ishte e gabuar, kurse opozita ka pasur të drejtë. Në fakt, kjo nuk ka ndodhur sepse zgjedhjet nuk janë fituar nga Partia Socialiste. Ne jemi krenarë për qeverisjen në këto tetë vite dhe për produktin e saj. 

Për çfarë jeni krenarë?

Për një sërë arritjesh të qeverisë në këto tetë vite, si goditja e krimit të organizuar; reforma fiskale, liria ekonomike dhe ulja e të gjitha barrierave burokratike për biznesin, taksat e ulëta, dyfishimi i buxhetit dhe i rrogave e pensioneve; zhvillimi i një prej akseve themelore strategjike edhe afatgjata të ekonomisë shqiptare që është industria energjetike (TAP-i dhe dhjetëra hidrocentrale të ndërtuara e në ndërtim e sipër); programi për bujqësinë që nxori fshatin nga varfëria, duke përfshirë edhe infrastrukturën rurale; infrastruktura e vendit dhe në veçanti ajo rrugore; penetrimi i internetit në shoqërinë shqiptare; arritjet më procesin e integrimit (MSA, anëtarësimi në NATO, lëvizja e lirë, përgatitja e vendit për statusin e vendit kandidat); rritja eksponenciale e investimeve të huaja dhe shmangja e krizës ekonomike globale. Zgjedhjet e lira.  

Po atëherë përse humbi PD?

Humbëm vallë pse bëmë rrugët? Humbëm vallë pse përmirësuam jetën në qytet dhe në katër vitet e fundit në veçanti në fshat? Jo. Pse nuk fitoi PS-ja? Sepse nuk ishte çështje thjesht e punëve. Pas tetë vitesh rotacioni është krejtësisht normal dhe ne e kemi pranuar rezultatin. Ka edhe efekte psikologjike, ka edhe lodhje, ka edhe ngurtësim të strukturave, qoftë burokratike shtetërore, qoftë partiake. Prandaj është e vlefshme gjithmonë opozita. Ajo të rigjallëron, të bën të reflektosh dhe ne do të bëjmë një opozitë e cila të jetë konstruktive dhe në mbrojtje të këtyre vlerave të mëdha të ligjit, të lirisë, të pronës së qytetarëve. Nuk mendonte kush, kur është hartuar strategjia elektorale që PS-ja do të kishte rritje dhe po kështu edhe vetë PS-ja ishte e bindur. 

Çfarë ka ndodhur? 

Ajo që ka ndodhur është që ne nuk mund të matnim, nuk mund të diagnostikonim deri në fund efektet e krizës ekonomike në rajon dhe reflekset e saj të padyshimta në realitetin shqiptar. Çdo krizë ka pasiguritë e veta që lidhen me punën, pronën, të ardhurat dhe familjen. Në këtë situatë, LSI pati një strategji më inteligjente dhe tha se ne do të gjendemi në cilëndo qeveri që do të krijohet. Kushdo që votoi për LSI mendoi se së pari nuk votoi kundër qeverisjes së katër viteve, së dyti votuan për të mbrojtur interesat personale, familjare në kontekstin e të papriturës që vjen pas zgjedhjeve, në kontekstin e kësaj krize dhe kësaj pasigurie. 

Çfarë duhet të bënit ju për t’i bërë ballë koalicionit të ri?

Ne mund të bënim diçka në nivel strategjik. Besoj se tandemi PS-LSI kishte të çara të mëdha. Ne u treguam shumë luajalë me ish-partnerët tanë në qeverisje dhe ky ka qenë një gabim që u pagua, dhe kjo është arsyeja e kësaj diference të madhe, pavarësisht se të gjithë parashikonim që rezultatet do të ishin të ngushta për cilindo që do të fitonte. Normalisht pas tetë vitesh qeverisje shanset më të mëdha nuk mund të ishin për qeverisjen. Kjo është një analizë e ndershme që pranon përgjegjësitë tona, por edhe që shpjegon mekanizmin që ndryshoi të gjithë peizazhin elektoral brenda 7-8 javësh. 

Çfarë duhet të bënte PD-ja në momentin që LSI-ja u largua nga koalicioni?

Ne jemi të gjithë përgjegjës për këtë, duhet të kishim ndarë qartë faktin që PS-LSI nuk mund të ishte një koalicion i vërtetë, mbështetur në faktin që ne mbajtëm peshën e LSI-së më 21 janar dhe më mbrapa. Sulmi opozitar nuk ishte vetëm kundrejt nesh, por ishte i drejtuar në një masë të madhe edhe kundër LSI. Nuk mund të kishte rilindje dhe faktikisht nuk ka rilindje, sepse ajo nuk është votuar. Nuk mund të ketë rilindje në momentin që platforma e Rilindjes ka qenë gjithashtu kundër LSI-së. Këto mund t’i kishim bërë të qarta shumë më mirë. Unë nuk jam pishman për shkak se PD dhe Kryeministri Berisha kanë bërë një fushatë të shkëlqyer, konstruktive dhe etike, ndonëse për fat të keq jo me efektivitetin e duhur. 

A ndikuan në humbjen e PD-së arroganca e ministrave, korrupsioni dhe shkëputja e PD-së nga baza?

Ka të vërteta, sigurisht, por nuk janë tërësisht të vërteta. Ne sot po ballafaqohemi me arrogancën e një partie që ende s’ka ardhur në pushtet, jo më kur të vijë në pushtet. Ka elemente të tilla qoftë të arrogancës, qoftë të humbjes së vëmendjes. Kjo është arsyeja që bëhen zgjedhje, kjo është arsyeja që ka rotacion dhe demokraci. Pa dyshim që ka edhe elemente të natyrës që ju përmendët dhe që janë të njohura. Nuk mund të mohohet një luftë e jashtëzakonshme që i është bërë korrupsionit. Transparenca në të gjithë aktivitetin ekonomik të qeverisë sot është si nata me ditën me para 8 vitesh, si për shembull, taksat, shpenzimet e qeverisë, prokurimet, të cilat janë elektronike dhe transparente për çdo qytetar. Sigurisht që në mënyrë të vazhdueshme sulme të paprincipta ndikojnë psikologjikisht zgjedhësit. Por, nëse zgjedhësit do të ishin të bindur që kjo ishte një qeverisje arrogante dhe e korruptuar, duhet të kishin votuar për opozitën që i denoncoi për vite me radhë, dhe jo për atë pjesë të ish-qeverisjes e cila ishte sulmuar edhe më ashpër se PD-ja. 

Kryetari i PD-së, Sali Berisha, mori përgjegjësinë e tij për humbjen e 23 qershorit. A janë ministrat dhe krerët e grupeve të punës përgjegjës për këtë rezultat? A ndieni ju përgjegjësi për humbjen ne qarkun e Elbasanit?

Unë besoj se kur flitet për përgjegjësitë, janë të përbashkëta dhe të gjithsecilit. Më duhet të evidentoj që Elbasani, qoftë edhe me një humbje të ngushtë, pas Beratit, duhet të ishte qarku i parë i cili do të duhej të humbiste një deputet. Ne qëndruam këtu për shkak të punës së mirë të bërë në Elbasan në radhë të parë, për shkak të grupit të deputetëve në radhë të dytë, dhe për shkak të investimeve që janë bërë në qarkun e Elbasanit në këto katër vite. Përmend këtu vetëm rrugën e Elbasanit, pasi këta dy muaj është harruar. Investimet që janë bërë në zonat rurale të Elbasanit janë të jashtëzakonshme. Zona të tëra rurale jetojnë shumë më mirë se tetë vite më parë dhe nuk jemi fare të sigurt nëse do të jenë më mirë pas katër vitesh. 

Pas dy javësh në vend do kemi një qeveri tjetër dhe në zyrën tuaj do të vijë një ministre femër. Cili është vlerësimi juaj për ekipin që ka krijuar Edi Rama?

Së pari më duhet të them se Rama u nxitua me krijimin e qeverisë. Është pa sens, përveçse për t’i ushtruar presion opinionit publik, një qeveri e cila krijohet jashtë legjitimitetit, pa marrë akoma konstituimin në Parlament dhe pa kryer të gjitha procedurat e duhura. Aq më tepër që mblidhet dhe funksionon si një qeveri paralele. Këto janë amatorizma. Lidhur me përbërjen e qeverise, duke përjashtuar Kodhelin dhe ndonjë tjetër, e cila ka disa eksperienca jo të parëndësishme qoftë në Bashki dhe Prefekturë, në tërësi ajo që vërej është që nëpërmjet ndarjes së mandatit të deputetit me të ministrit Rama skualifikoi të gjithë ata që kishin punuar për vite me radhë për ardhjen e PS-së në pushtet. Ky është një konstatim që e ndajmë gjerësisht me publikun. Së dyti, janë njerëz pa përvojë, njerëz që vijnë për herë të parë pa njohur organizmin shtetëror. Në tërësi të krijon idenë e një kabineti privat. 

Kryeministri i ardhshëm, Edi Rama, ka propozuar edhe ndarjen e mandatit të deputetit me atë të ministrit për të rritur efektivitetin në punë të kabinetit të ri. Si e shikoni këtë propozim të tij?

Kjo ka dy rreziqe: rreziku i parë është që në mungesë të mandatit të deputetit këta njerëz të jenë të manipulueshëm. Së dyti, është një grup njerëzish të cilët janë lidhje e drejtpërdrejtë e kryetarit dhe jo e partisë dhe e traditës së asaj partie. Kjo do të bëjë që vula e kryetarit të partisë dhe e Kryeministrit të ardhshëm në të gjitha ministritë të jetë shumë më e madhe. Nga ana tjetër do të krijojë edhe një problem që është për vetë qeverisjen, mbingarkimin e Kryeministrit me të gjitha problematikat e këtyre rishtarëve në detyrat e tyre. Kjo mund të bëhet një barrë tejet e rëndë, e cila mund të çojë në mosfunksionim të qeverisë. Këto janë gjëra që mbeten për t’u provuar nga realitetet. Nuk është një përzgjedhje që është në interesin më të mirë të vendit. Janë interesat e kryetarit të partisë që i dhanë formë partisë në këto tetë vite. Është normale që njerëz të rinj të hyjnë dhe është normale që të tjerë dalin për arsye nga më të ndryshmet. Por kjo qeveri në këtë kuptim nuk është qeverisje e PS-së. 

Qeveria “Rama”, ndonëse nuk e ka marrë ende detyrën zyrtarisht, ka zhvilluar mbledhjen e parë të saj. Keni një mendim për mënyrën se si Kryeministri i ardhshëm po e përdor këtë periudhë deri në votëbesimin në Parlament?

Mandati i PS-së nuk është një mandat fitimtar. Kjo është e çara më e madhe dhe që shpjegon edhe zhvillimet e mëtejshme. Pas tetë viteve opozitë PS-ja nuk arriti të rrisë prezencën e saj në elektoratin shqiptar me më shumë se gjysmë për qind. Fakti është që kjo qeveri e re që po krijohet, po krijohet mbi bazën e rritjes së faktorëve jashtopozitarë të katër viteve të fundit. Kjo duhet ta bënte kryetarin e Partisë Socialiste shumë më të moderuar në veprimet e tij. Në fakt, kompleksi i mosfitores së zgjedhjeve i krijon pasiguri dhe kjo po reflektohet, madje do të reflektohet edhe më shumë në të ardhmen. Por ne nuk do ta dhe nuk duhet ta mbështesim aksionin tonë mbi këtë bazë. Kjo është arsyeja që sjellja e kësaj qeverie informale, e nxitur nga kompleksi i mosfitores dhe pasiguria që rrjedh, e ka çuar në disa sjellje thellësisht arrogante. Fakti që mbledh ministrat e pas 9 shtatorit dhe i mbledh jo si një konsultë, se konsulta do të bëjë, por si një show arrogant në një hotel turistik, është një veprim për të imponuar një qeveri e cila nuk ekziston. Nga PS-ja e deri 2005-s Rama mund të kish marrë ndonjë karakteristikë më pozitive se sa thjesht mbledhjet në hotele dhe veprimtaria e partisë dhe qeverisë nëpër hotele, këtu apo diku tjetër, që ka qenë një gjë e modës në ato vite. Në fakt, nuk premton për gjë të mirë kjo qeveria e re e hotel “Nju Jorkut”. 

Si e cilësoni aksionin që do të nisë qeveria e re për prishjen e ndërtimeve në bregdet, përfshi edhe ato me leje?

Marrja e sëpatës në dorë, të cilën e ka pa leje përkundrejt ndërtimeve që janë me leje dhe janë të ligjshme, jo vetëm që nuk është e arsyeshme dhe jodobiprurëse për vendin, por është shprehje e një padurimi për t’u imponuar mbi shoqërinë shqiptare dhe mbi këdo. Edhe konferenca e mbajtur sot, gjithçka që shohim është se nuk shohim një Kryeministër që po konsulton ide mbi mënyrën e qeverisjes së këtij vendi, por një kryebashkiak që nuk është më i Tiranës, por kryebashkiak i përgjithshëm i Shqipërisë që po mendon tani për planet urbanistike dhe arkitekturën e vendit. Kryeministri duhet të mendojë edhe për këto, por  nuk është ky roli i tij, pasi ai do të duhej si fillim të merrej me ekonominë dhe krizën që po eskalon me ditë rrotull nesh, politikën e jashtme të Republikës së Shqipërisë, jo të Edi Ramës. E gjithë kjo së bashku me vijimin e përpjekjeve tradicionale për të shitur mediatikisht produkte kallpe, sulme bosh krijojnë premisat e dështimit. Kjo na tregon që më tepër se një Kryeministër, ai do të mbetet një kryebashkiak i përgjithshëm dhe një kryeredaktor i përgjithshëm i lajmeve në këtë vend. Kjo është rruga e dështimit. As opozita e nesërme nuk do të dëshironte një krizë të thellë. Ne duam të marrim një vend në dorë pas katër vitesh që të jetë më i mirë se ky që po lëmë sot. 

Pas humbjes më 23 qershor PD-ja zgjodhi kryetarin e ri me parimin “një anëtar – një votë”. Si e vlerësoni këtë proces, të parin që organizon kjo forcë politike që nga krijimi i saj?

Ishte procesi më i mirë për zgjedhjen e kryetarit. Në një moment që jemi të gjithë përgjegjës për zgjedhjet, e vetmja rrugë është për t’iu drejtuar anëtarësisë. Besoj se përfshirja sa më e gjerë e anëtarësisë së partisë do ti shërbejë konstituimit të kësaj partie për të ballafaquar rolin e opozitës dhe zgjedhjet e ardhshme. 

Rivali i Bashës në këtë garë, Sokol Olldashi, e kontestoi procesin duke renditur një sërë shkeljesh që u bënë, sipas tij, dhe që ishin shtimi i emrave në lista, vendosja e numrave rendorë në fletët e votimit. Keni një koment për qëndrimin e tij?

Për mua që të dy janë kolegë të vlefshëm. 

Po përsa i përket deklaratës së Patozit se fituesi i zgjedhjeve ishte paracaktuar?

Çdo anëtar i PD-së ka votuar për njërin prej kandidatëve. Berisha ka të drejtë si çdo anëtar i kësaj partie, por skam parë asnjë përfshirje të tij. 

Procesi i ripërtëritjes pritet të nisë në shtator. Çfarë kriteresh duhet të ndiqen në ripërtëritjen e lidershipit të PD-së?

Duhet të vendosë anëtarësia. Votimi i gjerë i anëtarësisë do të përcaktojë se cilat kritere dhe cilat standarde do kjo anëtarësi. 

A duhet të ketë ndryshim të ekipit aktual drejtues të PD-së?

Këtë duhet të mendojmë të gjithë ne si anëtarë të PD-së, jo si drejtues të saj. Prandaj është shumë i rëndësishëm parimi “një anëtar-një votë”. Ai nuk mund të zbatohet për çdo vend, sepse do ishte kundërthënëse në thelb. Por përfshirja sa më e gjerë e strukturave të partisë do përcaktojë nëpërmjet zgjedhjeve edhe se cilat do jenë kriteret dhe standardet që ata duan për ekipin drejtues. 

Ju do kandidoni si disa vite më parë për një nga postet drejtuese në momentin që do të hapet gara?

Nuk është momenti për të menduar për karrierat individuale aq sa për të menduar për ta ringritur fuqimisht këtë parti. Kjo do të thotë se si anëtar i kësaj partie do të bëj gjithçka drejt këtij qëllimi. 

Çfarë opozite duhet të bëjë PD-ja në këto katër vite, opozitë agresive si në 1997-2001, apo modelin e 2001-2005?

Të dyja periudhat ndryshojnë për nga konteksti politik. Unë jam për modelin 2001-2005, e kam vërtetuar këtë me qëndrimet e mia gjatë atyre viteve. Por ne nuk mund të bëjmë të njëjtën gjë që ka bërë Rama, që për interesat e partisë të dëmtojmë vendin. Zgjedhjet e vitit 2013 vërtetuan se zgjedhjet e vitit 2009 kishin qenë të lira dhe të ndershme. Madje hapja e disa kutive dhe procesverbalet, rasti i Lezhës, treguan se manipulimet ishin kryer nga Partia Socialiste. Por Rama zgjodhi si aksion politik hapjen e kutive, bojkotin, grevën e urisë së deputetëve, 21 janarin, bllokimin e ligjeve të integrimit europian. Ne do të bëjmë atë që duhet të bëjmë, gjithçka për axhendën e integrimit europian të Shqipërisë. Do të tregojmë vlerat tona si parti, vokacionin themelues të kësaj partie që është pro perëndimor, do tregojmë që jemi një parti që vendosim interesat e vendit mbi ato të partisë dhe të cilido kryetar. Opozita është zëri moral i qytetarit dhe po nuk foli opozita, nuk ka kush flet. Jashtë kontekstit të integrimit opozita do të jetë e gjallë, aktive për të mbrojtur lirinë, ligjin, pronën dhe për t’iu kundërvënë kësaj furie revanshi që PS ka nisur pa ardhur ende në qeveri. 

Ju tremb fakti se do të atakoheni nga maxhoranca e re nëse do të keni një post në lidershipin e PD-së?

Unë jam i përfshirë, pasi jam deputet. Për të bërë detyrën time në opozitë nuk më tremb asgjë. 

Cilat janë sfidat që ka Basha në krye të PD-së?

Ringritja e partisë. 

A duhet të ketë një qasje tjetër ndaj faktorëve të tjerë të së djathtës që janë jashtë PD-së?

Ka pak faktorë dhe jo sinjifikativë që janë jashtë së djathtës. Duhet bërë gjithçka për forcimin e kësaj të djathte mbi bazën e parimeve. 

A duhet të ketë ftesë konkrete për Topin?

Zoti Topi duhet të zgjedhë pozicionin e tij.

/panorama/