Prokurorët francezë kanë nisur hetimet kundërterroriste lidhur me përpjekjen e një personi me thikë që tentoi të hynte me forcë në kullën Eiffel në Paris mbrëmjen e së shtunës. Në këtë incident askush nuk ka pësuar lëndime.
I dyshuari, i cili është i arrestuar, u ka thënë hetuesve se dëshironte të kryente sulm kundër një ushtari dhe ishte në kontakt me një anëtar të grupit ekstremist, Shteti Islamik.
Personi i dyshuar, i moshës 19 vjeç, ka probleme psikike. Raportohet se ai është me shtetësi franceze i lindur në Mauritani të Afrikës Perëndimore.
Në kohën e incidentit, kulla Eiffel ishte e ndriçuar me ngjyrat e klubit të futbollit, Paris Saint-Germain.
Prej sulmeve të nëntorit të vitit 2015 në Paris, nga të cilat u vranë 130 vetë, në Francë ende mbretëron gjendje e jashtëzakonshme.
