Prindërit që përdorin mjetet e mbikëqyrjes për fëmijët në Instagram do të marrin njoftime nëse adoleshentët e tyre kërkojnë në mënyrë të përsëritur terma që lidhen me vetëvrasjen apo vetëdëmtimin.
Kompania mëmë Meta bëri të ditur se kjo është hera e parë që do të informojë në mënyrë proaktive prindërit për kërkime të tilla në platformë, përtej bllokimit të përmbajtjeve dhe drejtimit të të rinjve drejt burimeve të jashtme të ndihmës.
Fillimisht, njoftimet do të aktivizohen për përdoruesit e përfshirë në programin “Teen Accounts” në Mbretëria e Bashkuar, Shtetet e Bashkuara të Amerikës, Australi dhe Kanada, ndërsa më pas do të shtrihen edhe në vende të tjera.
Organizata britanike për parandalimin e vetëvrasjeve Molly Rose Foundation e ka kundërshtuar ashpër masën, duke paralajmëruar se ajo “mund të bëjë më shumë dëm sesa mirë”.
Drejtori ekzekutiv i saj, Andy Burrows, tha se njoftimet mund t’i lënë prindërit të papërgatitur për biseda të ndjeshme me fëmijët e tyre.
Fondacioni u themelua nga familja e Molly Russell, e cila i dha fund jetës në vitin 2017, në moshën 14-vjeçare, pasi kishte parë përmbajtje për vetëdëmtim në rrjete sociale, përfshirë Instagramin.
Edhe babai i saj, Ian Russell, shprehu dyshime mbi efektivitetin e sistemit të ri të njoftimeve, duke theksuar se një mesazh i tillë mund të shkaktojë panik te prindërit.
Sipas Metës, njoftimet do të dërgohen me e-mail, SMS, përmes WhatsApp ose brenda aplikacionit, në varësi të të dhënave të kontaktit që ka kompania.
Kompania thekson se njoftimet do të shoqërohen me burime këshilluese për të ndihmuar prindërit të menaxhojnë situatën. Megjithatë, Meta paralajmëron se sistemi mund të “gabojë në favor të kujdesit”, duke dërguar njoftime edhe kur nuk ka rrezik real.
Ged Flynn nga organizata Papyrus Prevention of Young Suicide tha se, ndonëse çdo hap drejt mbrojtjes së të rinjve është i mirëpritur, problemi kryesor mbetet ekspozimi i vazhdueshëm i fëmijëve ndaj përmbajtjeve të rrezikshme online.
Ndërkohë, Leanda Barrington-Leach nga 5Rights Foundation kërkoi që sistemet e platformës të projektohen që në fillim të përshtatshme për moshën.
Kompanitë e mediave sociale po përballen me presion gjithnjë e më të madh nga qeveritë për të rritur sigurinë e fëmijëve online. Në fillim të vitit, Australi ndaloi përdorimin e rrjeteve sociale për moshat nën 16 vjeç, ndërsa Spanjë, Francë dhe Mbretëria e Bashkuar po shqyrtojnë masa të ngjashme.
Së fundmi, drejtori ekzekutiv i Metës, Mark Zuckerberg, dhe kreu i Instagramit, Adam Mosseri, janë paraqitur në gjykatë në SHBA për t’u përballur me pretendimet se kompania ka synuar përdoruesit e rinj me praktikat e saj të biznesit.
