Mbledhja e sotme e Komisionit të Integrimit, ku u diskutua nen për nen ligjin për diasporën, është shoqëruar me debate mes përfaqësuesve të maxhorancës dhe të opozitës.
Deputeti i PD-së Klevis Balliu akuzoi qeverinë për taksën për rrugën e Kombit, ndërsa pyeti me ironi për faktin nëse kjo ishte mënyra që të afrohej diaspora.
Ministri i Diasporës, Pandeli Majko, pohoi se procedura e regjistrimit të emigrantëve do të bëhej nga Komisioni i Reformës Zgjedhore.
Kaq mjaftoi që të ndërhynte Nard Ndoka, i cili ironizoi ministrin, ndërsa theksoi se këtë të fundit u vendos në këtë post Rama për hatër.
DEBATET
Klevis Balliu: Në një kohe që kaloni ligj për diasporën, i vendosni një takse shqiptarëve në Kosovë. 10 euro si asnjë vend tjetër. Kështu do e afroni diasporën?
Mimi Kodheli: Kush do ta afroj diasporën? Diaspora të rrije atje ku është. Z. Majko kur thotë ‘ta afrojmë diasporën’ e ka në mënyrë metaforike.
Tritan Shehu: Kjo strukturë do të përdoret për të marrë votat e emigrantëve.
Pandeli Majko: Regjistrimin e emigranteve dhe mënyrën e votimit të tyre do ta zgjidh Komisioni i Reformës Zgjedhore.
Nard Ndoka: Mos e ngacmojmë Majkon, e dimë që ka një ministri improvizore, të sajume. E bëri Rama ministër për hatër. Më mirë ta lëmë si ministër pa portofol, që mos t’i bëjmë lëmsh, kjo është ministri provizore, e dimë të gjithë.
