Java e parë e Superiores, kampionati i 78-të kombëtar i futbollit, nisi dje, teksa në dy ndeshje pati kontestime dhe dyshime të forta për penalltitë e dhëna “in extremis”, në Elbasan dhe Korçë. Sidomos Laver Alla, kryesori i sfidës Skënderbeu-Flamurtari 2-1, është vënë nën akuzë nga media, por edhe specialistët e fushës. Kuptohet, për vlonjatët është një “kamikaz”, që e filloi shumë shpejt anësinë e tij pro kampionëve. Veç trajnerit Gugash Magani, që tha direkt pas ndeshjes se penalltia e golit të dytë për juglindorët ishte fantazmë, ka reaguar edhe ish-presidenti i Flamurtarit, Shpëtim Gjika. Përmes pak fjalëve, që thonë shumë, ai ka lënë një status, që akuzon drejtpërdrejt Laver Allën: “O Laver Alla! Po të kanë çuar në Korçë t’i biesh bilbilit, jo klarinetës! O fyell!” Rikujtojmë se edhe Gugash Magani ka folur me tone të ashpra kundrejt gjykimit: “Mendoj se nuk ishte penallti. Duhej të kishim bërë më mirë në këtë takim. Po të ishim pak më të kujdesshëm do të kishim marrë një pikë. Penalltia vendosi rezultatin.”