Ushtria izraelite pretendon se vrau një komandant të Forcës Quds të Iranit – njësia e Korpusit të Gardës Revolucionare Islamike (IRGC) përgjegjëse për operacionet e jashtme – në një sulm ndaj Teheranit.
Forcat e Mbrojtjes së Izraelit (IDF) thanë se vranë Daoud Ali Zadeh, i cili përshkruhet si “komandanti i përkohshëm” i Korpusit të Libanit të Forcave Quds dhe komandanti iranian “me gradën më të lartë” përgjegjës për Libanin. Paraardhësi i Zadeh, Hassan Mahdavi, u vra më parë në një sulm të IDF, tha ushtria.
Divizioni që drejtoi Zadeh mbështet Hezbollahun në ndërtimin e forcave të tij dhe funksionon si lidhja midis udhëheqjes së lartë të IRGC dhe Hezbollahut, tha IDF. Sipas IDF, korpusi i Libanit ishte ura midis IRGC dhe Hezbollahut, milicisë së mbështetur nga Irani në Liban që Izraeli e ka shënjestruar vazhdimisht që nga e hëna.
Pasi pretendoi se kishte vrarë Zadeh-un, zëdhënësi i ushtrisë izraelite, Avichay Adraee, i paralajmëroi “të gjithë përfaqësuesit e mbetur të Ministrisë Iraniane të Terrorit në Liban” të largoheshin përpara se të bëheshin shënjestër. Zëdhënësi i ushtrisë izraelite, Avichay Adraee, tha se “përfaqësuesit e regjimit” iranianë kishin 24 orë kohë për t’u larguar.
“Pas kësaj kohe, asnjë vendndodhje në Liban nuk do të konsiderohet si strehë e sigurt për personelin e regjimit iranian”, tha Adraee. IDF do t’i sulmojë këto objektiva me forcë të plotë kudo që të ndodhen.
