Kryeministri i Spanjës, Pedro Sánchez, ka reaguar ndaj kërcënimeve të presidentit amerikan, Donald Trump, për ndërprerje të marrëdhënieve tregtare mes dy vendeve, pas kundërshtimit të Madridit ndaj bombardimeve mbi Iranin.
Në një fjalim televiziv mëngjesin e së mërkurës, Sánchez deklaroi se qëndrimi i qeverisë së tij mund të përmblidhet me fjalët: “Jo luftës”.
Ai bëri thirrje që të mos përsëriten “gabimet e së kaluarës”, duke iu referuar pushtimit të Irakut në vitin 2003, që sipas tij nuk arriti objektivat e shpallura, por përkundrazi krijoi pasiguri dhe përkeqësoi jetën e shumë qytetarëve.
Sánchez paralajmëroi se sulmet ndaj Iranit mund të kenë një ndikim të ngjashëm ekonomik për miliona njerëz të zakonshëm dhe theksoi se qeveria po shqyrton masa për të zbutur pasojat e mundshme.
Një ditë më parë, Trump premtoi se do të “ndërpresë çdo lidhje” me Spanjën dhe e cilësoi vendin si “të tmerrshëm”, pasi Sánchez refuzoi të lejojë përdorimin e bazave ushtarake amerikane në territorin spanjoll për sulme ndaj Iranit.
Madridi i ka quajtur këto sulme një “ndërhyrje ushtarake të pajustifikuar dhe të rrezikshme”.
