Shoqëria e flutrimeve Alitalia informon se për shkak të grevës së punonjësve të kontrollit, sot rreth 40 % e fluturimeve kombëtare e ndërkombëtare me këtë kompani, janë anuluar.
Greva 24-orëshe përfshin anulimin e rreth 220 fluturimeve mes të cilave dhe dy fluturimet me numër AZ 582 Roma- Tirana e AZ 585 Tirana- Roma.
Grupet sindikaliste të punonjësve të kësaj shoqërie ajrore protestojnë ndaj planit të ri financiar, të sapo miratuar nga drejtuesit e Alitalias, i cili parashikon shkurtimin e 2037 vendeve të punës për personelin në tokë e të rreth 400 punonjësve të personelit fluturues.
Plani financiar i Alitalias për 2017-n kërkon një reduktim prej 240 milionë eurosh të shpenzimeve të jashtme të shoqërisë në sektorin e mirëmbajtjes, pastrimit, furnizimit ushqimor etj.
Në vitin 2008, Alitalia numëronte 22 mijë punonjës. Dy krizat ekonomike që kanë përfshirë këtë shoqëri, përkatësisht më vitin 2008 e më 2014-n kanë pasur pasojë humbjen e rreth 10 mijë vendeve të punës e aktualsiht numri i punonjësve të Alitalias është rreth 12 mijë.
Grupet sindikaliste të punonjësve të kësaj shoqërie deklarojnë se “plani i i ri financiar është i papranueshëm pasi parashikon vetëm reduktime financiare e shkurtimi i vendeve të punës të punononjësve të saj vë në vështirësi ekonomike dhjetëra-mijëra familje italiane.”
/Ora News/
