Policia e Shtetit ka reaguar menjëherë pas lajmit të publikuar në mediat italiane për sekuestrim e 2.3 tonëve drogë e cila vinte nga Shqipëria dhe një nga personat e arrestuar është një 24-vjeçar shqiptar.
Nëpërmjet një komunikate për shtyp, Policia e Shtetit ka dhënë informacion lidhur me këtë megaoperacion.
Njoftimi i policisë:
Në lidhje me një sasi prej 2322 kg lënde narkotike të sekuestruar nga GdF në zonën e San Benedetos Itali ju informojmë se:
Gomonia oqeanike ka mundur të shkarkojë në breg të detit lëndën narkotike dhe është larguar në ujërat detare mes Kroacisë dhe Malit të Zi duke i shpëtuar ndjekjes së skuadrave të GdF.
Skuadrat e GdF në afërsi të bregut në zonën e San Benedetos kanë sekuestruar lëndën narkotike të hedhur nga gomonia në një sasi prej 2322 kg e dyshuar marjuanë dhe 625 litra benzinë, si dhe kanë arrestuar dy persona të cilët ishin me një furgon gati për të transportuar lëndën narkotike, konkretisht: shtetasi shqiptar rezident në Itali K.D., 24 vjeç dhe shtetasi italian R. A. 63 vjeç.
Vijojnë hetimet e përbashkëta Itali -Kroaci-Mal i Zi dhe Shqipëri, ku ka një shkëmbim intensiv të informacioneve me policine italiane dhe Guardia di Finanza per hetimin e rastit, por nuk ka elemente që lidhin këtë rast trafikimi me Shqipërinë.
Gomonia ka mundur t’i shpëtojë ndjekjes që ka zgjatur disa orë derisa ka humbur gjurmët në ujërat mes Kroacisë dhe Malit të Zi
Vijon kontrolli në det për gjetjen e gomones dhe arrestimin e trafikantëve.
