Një sasi e madhe lënde narkotike e llojit kanabis sativa, ende e pakonfirmuar zyrtarisht, është sekuestruar këtë të premte në portin e Durrësit.
Sipas burimeve policore, sasia e lëndës narkotike është gjetur e fshehur në një kamion që pritej të imbarkohej në një nga tragetet e linjës Durrës-Bari.
Agjentët e antidrogës janë në vendngjarje dhe po bëjnë kontrollin e mjetit, për të përcaktuar më pas edhe sasinë e drogës së kapur.
Sipas burimeve policore ende të pakonfirmuara, sasia e drogës e sekuestruar në kamion është rreth 700 kg.
Drejtuesi i mjetit, ku është gjendur sasia e lëndës narkotike është ndaluar nga policia dhe është shoqëruar në komisariat për t'u marrë në pyetje.
Dyshohet se sasia e drogës kishte për destinacion vendin fqinjë, Itali.
