9shtator 2015 – Këshilltari ushtarak i presidentit Nishani provokon me status në facebook, duke quajtur anëtarët e komisionit të sigurisë, si ish-sigurimsa, qelbësira apo persona që kanë marrë juridikun me lekë. Sipas Piro Ahmetajt, në këtë komision janë dhe Prenga, Stërkaj apo Frroku, që bëhen palë duke kaluar ligjet e mbrojtjes në kuvend, bashkë me deputetë të tjerë me rekorde kriminale.

Dy ditë më vonë, kreu i komisionit të sigurisë, Spartak Braho, kërkon nga ministrja e Mbrojtjes që të marrë masa disiplinore ndaj Ahmetajt. “Këshilltari ushtarak i presidentit, me gradë gjeneral brigade shpreh një mllef politik, në kundërshtim me funksionin dhe detyrën që ai mban. Presidenti duhet ta thërrasë për të dhënë shpjegime për deklaratën dhe ministrja të nisë procedurën për marrjen e masave ndaj këshilltarit”, tha Braho.

Statusi i Piro Ahmetajt

“Konfirmoj se të gjitha ligjet e reformës së mbrojtjes kanë kaluar në Kuvend me nga 72 vota nga 140 dhe shtoj se në asnjë rast në 23 vjet demokraci nuk ka ndodhur kjo qasje sovjetësh (gjithë pushteti Sovjetëve/fitimtarëve dmth aleancës kriminelëve, sigurimsave dhe qelbësirave).” Konfirmoj po ashtu se në këto 72 vota PRO ARROGANCËS (nga 140deputetë) – ka qenë dhe vota e banditëve si Prenga (subjekt i këtij rasti), Frroku, Lutaj, Sterkaj dhe 8 deputetët me rekorde të rënda kriminale dhe disa ish-ushtarakë mediokër deri në perversitet.

Po ashtu konfirmoj se në Komisionin e Sigurisë Kombëtare – gati gjysma janë ish-oficerë&Kryetarë Dege të Sigurimit dhe Hetuesisë Kriminale të Shtetit (që me diploma falco janë konvertuar “Juridiks” dhe Doktorë Shkencash” … dhe pjesa tjetër mediokër deri për t’u mëshiruar (që vënë syze miopi për t’u dukur intelektualë)…  Ky komision, dhe jo vetëm, do të futet në historinë e Parlamentit dhe reformave të mbrojtjes si komisioni i turpit, kriminelëve dhe perversëve.

Siguroj këdo kontribues dhe të shqetësuar se mund të dojë ca kohë por nuk do të vonojë shumë që këto MONSTRA (dhe ata që heshtin), do të përgjigjen për të gjithë këtë histori turpi dhe arrogancë staliniste mbi sistemin e sigurisë dhe qasjen bolshevike me asetet strategjike të mbrojtjes”.

Reagimi i Brahos

Prononcimin publik të mësipërm të mbushur me mllef haptazi politik, e konsiderojmë ngjarje të rëndë dhe shkelje të paprecedentë te marrëdhënieve institucionale, shkelje të rëndë të legjislacionit shqiptar në fuqi, të statusit të ushtarakut, të etikës dhe ligjit për depolitizimin, si fyerje dhe shpifje ndaj veprimtarisë së Komisionit të Sigurisë Kombëtare dhe deputetëve të tij.  Eshtë i pakuptueshëm njëkohësisht burimi i këtij “frymëzimi”, motivet të cilat i vlerësojmë se bien në kundërshtim të hapur me funksionet dhe detyrën që ai kryen si këshilltar pranë Presidentit të Republikës.

Në këto kushte, krahas vënies në dijeni të këtij akti dhe qëndrimi jo normal të z.Pirro Ahmetaj, ju kërkojmë të thirret nga Presidenti për të sqaruar përmbajtjen e kësaj deklarate, të bëni vlerësimin përkatës duke informuar për sa më sipër Kuvendin e Shqipërisë. Znj. Ministre, duke qenë se prononcimet publike të Ushtarakut Aktiv Gjeneral Brigade Piro Ahmetaj vijnë në kundërshtim të hapur me kushtetutën dhe me ligjet në Republikën e Shqipërisë, me ligjet që normojnë veprimtarinë dhe drejtimin e Forcave të Armatosura të Republikës së Shqipërisë kërkojmë :

Nisjen e procedurave disiplinore për ushtarakun Pirro Ahmetaj me gradë Gjeneral Brigade, me detyrë Këshilltar Ushtarak pranë Presidentit të Republikës së Shqipërisë, vënien përpara përgjegjësisë ligjore si dhe marrjen e masave që parashikon ligji në këto raste.

/Portali DurresLajm/