Kina dhe SHBA-të bien dakord për një plan kuadër dhe zbatimi pas dy ditësh bisedimesh tregtare në Mbretërinë e Bashkuar, tha të martën vonë i dërguari më i lartë tregtar i Kinës, Li Chenggang.
Raund i ri bisedimeve tregtare midis SHBA-së dhe Kinës që synojnë të arrijnë një marrëveshje filloi të hënën në Londër. Takimi pasoi bisedën telefonike të Presidentit të SHBA-së Donald Trump me Presidentin Kinez Xi Jinping javën e kaluar, kur Trump u shpreh më vonë se biseda “rezultoi në një përfundim shumë pozitiv për të dy vendet.
Në bisedime u trajtuan gjërësisht kufizimet e Kinës mbi eksportet e metaleve të rralla në SHBA dhe kufizimet e Uashingtonit mbi disa eksporte teknologjike në Kinë, si dhe mosmarrëveshjet mbi tarifat.
“Të dyja palët ranë dakord, në parim, për kuadrin për zbatimin e konsensusit të dy krerëve të shteteve në thirrjen e tyre të vendosur më 5 qershor, si dhe për konsensusin e takimit në Gjenevë,” u tha Li gazetarëve në Londër.
Ai tha se të dyja palët do t’u raportojnë udhëheqësve të tyre mbi bisedimet dhe kuadrin e arritur në Mbretërinë e Bashkuar.
Li tha se ekipet kineze dhe amerikane punuan “me shumë zell” dhe patën “shkëmbime shumë të thella” gjatë ditëve të fundit, duke shtuar se komunikimi i tyre ishte “shumë profesional, racional, i thelluar dhe i sinqertë”.
Ai shprehu shpresën se përparimi në bisedime është “i favorshëm për rritjen e besimit” midis dy vendeve, për të promovuar marrëdhënie të qëndrueshme tregtare dhe ekonomike dhe për të kontribuar pozitivisht në zhvillimin ekonomik global.
Të dyja palët synojnë të mbështeten në një marrëveshje të arritur në Gjenevë më 12 maj, kur ranë dakord për një pezullim 90-ditor të shumicës së detyrimeve dhe për të hequr masat e vendosura që nga fillimi i prillit, pasi Trump njoftoi tarifa “reciproke” për partnerët tregtarë të SHBA-së.
