Kalimi i qytetarëve në pikën kufitare të Kapshticës është ndërprerë pasditen e sotme. Shkak është bërë një defekt në sistemin doganor të palës greke, e cila ka ndërprerë punën e saj. Ndërprerja e punës ka ndodhur rreth orës 16:00 dhe nuk dihet se kur do të zhbllokohet. Drejtoria Vendore e Kufirit dhe Migracionit në Korçë bën me dije se në dalje nga Republika e Shqipërisë aktualisht janë krijuar radhë jo të gjata të mjeteve. “Nuk bëhet me dije se kur mund të riparohet problemi dhe të rifillojë puna,” – sqaron Drejtoria Vendore e Kufirit dhe Migracionit në Korçë.