Qeveria e Kosovës ka marrë vendim që tarifë doganore 100 përqind të vendosë edhe për markat ndërkombëtare që prodhohen në Serbi dhe Bosnje dhe nga këto shtete hyjnë në Kosovë.
Në vendimin e 21 Nëntorit kur qeveria vendosi tarifë 100 për qind për produktet më origjinë nga Serbia dhe Bosnja-Hercegovina, kishte lejuar që për nëntë marka ndërkombëtare të mos të zbatohet tarifa.
Ministri i Tregtisë dhe Industrisë i Qeverisë së Kosovës, Endrit Shala, i tha Radios Evropa e Lirë se tashmë asnjë produkt që vjen nga Serbia dhe Bosnjë-Hercegovina, nuk përjashtohet nga tarifa prej 100 për qind.
“Nga 21 Janari, secili produkt që ka origjinë nga Serbia dhe Bosnjë e Hercegovina, e ka taksën prej 100 për qind”, ka thënë Shala.
Në mbledhjen e Qeverisë së Kosovës, ministri Shala ka theksuar që vendosja e tarifës edhe për markat ndërkombëtare që prodhohen në Serbi dhe Bosnjë-Hercegovinë, nuk mund të ndikojë në marrëdhëniet me vendet prej nga janë këto produkte.
Ai ka theksuar se ka biseduar me përfaqësuesit e këtyre kompanive dhe ato tashmë kanë filluar që ta furnizojnë me markat e veta tregun në Kosovë përmes vendeve tjera dhe jo nga Serbia. /REL
