Një ngjarje e rëndë ka ndodhur mbrëmjen e kësaj të marte në Prishtinë, ku një grua ka qëlluar për vdekje me armë zjarri, kunatin e saj.
Mësohet se ngjarja ka ndodhur në rrugën “Ismet Krasniqi” të kryeqytetit kosovar.
Vrasjen e ka konfirmuar zëdhënësja e policisë në Prishtinë, Flora Ahmeti, e cila është shprehur për mediat se e dyshuara me inicialet N.M. është vetëdorëzuar në komisariat.
“Sot rreth orës 19:20 kemi pranuar informatën për një vrasje që ka ndodhë në rrugën “Ismet Krasniqi” në Prishtinë. Menjëherë policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen”, tha ajo.
Aktualisht hetuesit nën koordinimin e prokurorisë janë duke punuar për të hedhur dritë mbi shkaqet që çuan në ngjarjen e rëndë, ndërsa trupi i pajetë pritet të tërhiqet nga ekspertiza për t’u dërguar në obduksion.
