Kisha e Familjes së Shenjtë në Gaza ka ndezur pemën e Krishtlindjeve për herë të parë pas dy vitesh luftë. Është mesha e natës së Krishtlindjeve dhe besimtarët kanë mbushur sallën kryesore të lutjeve. Shumë prej tyre janë të emocionuar dhe të lumtur, jo vetëm sepse është Krishtlindje, por sepse janë ende gjallë, shkruan Aljazeera.

Shkëlqimi i dritave në pemën e madhe të Krishtlindjeve dhe dekorimet e festave nuk mund ta fshijnë realitetin e ashpër të lënë pas nga lufta në Gaza. Kisha vendosi t’i kufizonte festimet në një shërbesë lutjeje dhe mbledhje të shkurtra familjare, por kambanat ranë fort dhe vetëm kjo i mbushi njerëzit me gëzim.

Një nga këta njerëz është 58-vjeçari Dmitri Boulos, i cili nuk e festoi Krishtlindjen gjatë luftës. Ai u zhvendos së bashku me gruan dhe dy fëmijët e tij në ditët e para të luftimeve, pasi bombardimet e rënda izraelite goditën shtëpinë e tij në zonën Tal al-Hawa, në jug të qytetit të Gazës.

“Ne ikëm drejt kishës duke kërkuar siguri në atë kohë, por doli që nuk kishte vend të sigurt. Kisha u godit dy herë ndërsa ishim brenda dhe humbëm miq dhe të dashur gjatë asaj periudhe”, tha Boulos.

Kisha e Familjes së Shenjtë, e vetmja famulli katolike në Gaza, ka mbajtur prej kohësh rëndësi simbolike përtej Rripit të Gazës. Gjatë gjithë luftës, i ndjeri Papa Françesku e telefononte famullinë pothuajse çdo ditë, duke mbajtur një linjë të drejtpërdrejtë me komunitetin e rrethuar.

Shumica e të krishterëve të Palestinës jetojnë në Bregun Perëndimor të pushtuar dhe në Jerusalemin Lindor, duke arritur në total afërsisht 47,000 deri në 50,000, me 1,000 të tjerë në Gaza para luftës.

Numri i të krishterëve në Gaza është zvogëluar vitet e fundit. Sot, kanë mbetur disa qindra, një rënie e ndjeshme nga 3,000 të regjistruar në vitin 2007.

Gjatë luftës, sulmet izraelite shënjestruan disa vende të krishtera ku shumë palestinezë të zhvendosur po strehoheshin.

Edhe pse Kisha e Familjes së Shenjtë nuk u “pikas” nga Izraeli në zonat e shënuara për dëbime, kishat e tjera në Qytetin e Gazës, përfshirë Kishën Ortodokse Greke të Shën Porfirit dhe Kishën Anglikane të Shën Filipit, u vendosën.

Por gati 550 personat e zhvendosur që strehohen në Kishën e Familjes së Shenjtë ende nuk i besojnë ushtrisë izraelite. Sipas tyre, Kisha është sulmuar shumë herë më parë, pavarësisht garancive izraelite se nuk synon vendet e shenjta.