“E bukura e Adriatikut” hapi sezonin turistik të kroçerave për vitin 2024 në portin e Durrësit.
Ndonëse preku brigjet shqiptare pa turistë në bord dhe vetëm për të ndërruar ekuipazh, mjeti luksoz turistik me gjatësi 111 metra dhe me flamur belg është i pari që sinjalizon nisjen e një sezoni, që pritet të jetë i suksesshëm.
“Presim të vijmë në Durrës dhe Sarandë 3 herë këtë vit. Më 30 korrik do të jetë vizita e parë me turistë në Durrës dhe më 24 shtator lundrimi i fundit. Këtë vit do të sjellim në total rreth 400 pasagjerë në vendin tuaj”, thotë për “DurrësLajm” Leo Stanic, kapiteni i kroçerës, ndërsa menaxheri Pedro Morreira shton se “janë kryesisht francezë, por këtë vit do të kemi edhe shumë gjermanë. Do të kemi shumë turistë edhe nga SHBA, Britania e Madhe dhe Spanja.”
Nga porti i Durrësit, kapiteni i kroçerës “besnike” të brigjeve shqiptare thotë se këtë vit do t’i prekë më pak këto të fundit.
“Vjet erdhëm pak më shumë, 8 herë, por këtë herë kompania bëri ndryshime, vendosi pak më gjatë qëndrimin në Greqi. Itinerari që kemi, është shumë i bukur, por tani po përpiqemi të tërheqim turistë më të rinj.
Gjithmonë ka ndryshime, këtë vit vijmë më pak në Shqipëri, vitin tjetër shumë më shumë. Kjo për të mbajtur balancën, por sigurisht edhe për t’ju përgjigjur kërkesës së turistëve”, deklaroi ai.
Vitin që lamë pas, 22 kroçera ndaluan në portin e Durrësit, duke sjellë me vete mijëra turistë.
Për periudhën janar-dhjetor 2023, mjetet luksoze turistike dhe të kënaqësisë i sollën arkës së shtetit më shumë se 1 miliardë lekë të reja, vetëm për furniznimin me karburant.
K.Gj.
