Kryebashkiakja Sako: Pas pak javësh, Sukthi do të furnizohet 24 orë me ujë

Kryebashkiakja në detyrë e Durrësit, përmes një postimi në rrjete sociale jep lajmin e mirë për banorët e Njësisë Administrative Sukth.

“Pas pak javësh Sukthi do të furnizohet 24 orë me ujë.

Duke inspektuar punimet për investimet që po kryhen nga ndërmarrja e Ujësjellës kanalizimeve të Durrësit me fonde të qeverisë shqiptare për përmirësimin e furnizimit me ujëtë Sukthit. Investimi ka përfunduar në zonën e Sukthit të ri dhe tashmë po kryhen punime në lagjen 1 në Vadardhë. Me përfundimin e këtyre punimeve Sukthi do të furnizohet me ujë orë”,- njofton Sako.

Më tej, në postim, kryebashkiakja sqaron se shumë shpejt përfundon investimi në NJA-në Katund të Ri, ndërsa në Ishëm po punohet për përmirësimin e furnizimit me ujë.

Ndërkohë një investim i rëndësishëm pritet të nisë në zonën e Spitallës dhe Portoromanos, në përfundim të të cilit këto zona do të furnizohen 24 orë me ujë.

“Po kështu vijon puna për përmirësimin e furnizimit me ujë në Ishëm dhe shumë shpejt përfundon investimi në Katund të Ri. UKD ka lidhur tashmë kontratën dhe shumë shpejt fillon puna edhe për ndërtimin e linjës së re të shpërndarjes së ujit në zonën e Spitallës dhe Portoromanos. Ky investim parashikon edhe instalimin e matësve inteligjentë dhe ndërtimin e depos së ujit 2 000 m³. Në përfundim të këtij investimi Spitalla dhe Portoromano do të furnizohen 24 orë me ujë”,- shkruan kryebashkiakja Sako.