Kryeministrja e Italisë, Giorgia Meloni rikthehet në qendër të vëmendjes ndërkombëtare, këtë herë në faqen e parë të revistës amerikane “Time”, me një intervistë të saj të publikuar në një artikull të gjatë.
Revista javore amerikane e paraqet atë në kopertinë, me titullin “Ku po e udhëheq Giorgia Meloni Evropën”, duke paraqitur në artikull ngritjen e saj, axhendën e saj dhe bindjet e saj politike.
“Homogjenizimi i globalizmit”
“Para së gjithash, ne duhet të mbrojmë atë që jemi: kulturën tonë, identitetin tonë, qytetërimin tonë”, deklaron kryeministrja në intervistë, duke u rikthyer në një nga temat kryesore të diskursit të saj politik.
Sipas Melonit, sfida bashkëkohore është t’i rezistojmë një “globalizmi homogjenizues” që rrafshon identitetet kombëtare, ndërsa deklarohet në favor të integrimit evropian, për sa kohë që nuk fshin dallimet. Gjatë intervistës, Meloni e pyet drejtpërdrejt intervistuesin, gazetarin Massimo Calabresi: “Ju jeni një person i ndershëm. A ka diçka rreth fashizmit që ju kujton përvoja ime, në atë që bëj në qeveri?” Një pasazh që, thekson “Time”, është tregues i referencave të vazhdueshme ndaj fashizmit ndaj të cilit Meloni dhe partia e saj janë të nënshtruara.
Jo kuotave gjinore
Meloni mbështet një nacionalizëm “mbrojtës” si përgjigje ndaj një globalizimi të dështuar. “Dua të rindërtoj krenarinë e të qenit ajo që jemi, pavarësisht kostos”.
Ky mesazh shkon njësoj me me deklaratat e këshilltarit të saj politik, Giovanbattista Fazzolari, i cili i konsideron Vëllezërit e Italisë “partinë që sot bashkon patriotët e moderuar”, pavarësisht nga origjina e tyre politike.
Si gruaja e parë që drejton një qeveri italiane, Meloni e hedh poshtë idenë e kuotave gjinore si një mjet të dobishëm: “Më është dashur të përballem me stereotipe qesharake, por nuk mendoj se ndërhyrjet nga lart poshtë janë të nevojshme për të korrigjuar këto diskriminime”.
Politika e jashtme dhe marrëdhënia me Trumpin
Në frontin ndërkombëtar, Meloni përsëriti mbështetjen e saj për Ukrainën dhe admirimin e saj për presidentin e Ukrainës Volodymyr Zelensky, duke mbrojtur kauzën e tij edhe në takimin e saj të fundit me presidentin amerikan Donald Trump. “Ai është një luftëtar dhe unë jam një luftëtare”, u shpreh ajo.
Dialogu midis të dyve, sipas Melonit, ishte i drejtpërdrejtë, por jo konfrontues. Në intervistë, Meloni hodhi poshtë gjithashtu sulmet më të përsëritura: “Ata më kanë akuzuar për gjithçka, nga lufta në Ukrainë deri te vdekjet në Mesdhe, thjesht sepse nuk kanë argumente”. Ajo shtoi: “Nuk jam raciste, nuk jam homofobike, nuk jam gjithçka që kanë thënë se jam”.
