Kur je në takimin e parë me dikë, është krejt normale të ndihesh i emocionuar. Të të pushtojë ndjenja e admirimit dhe tërheqjes është pjesë e bukur e fillimit të një lidhjeje. Por ekziston një vijë e hollë mes entuziazmit të sinqertë dhe një sjelljeje që mund të jetë manipuluese, i ashtuquajturi “love bombing”.

Çfarë është “love bombing”?

Siç e tregon edhe vetë termi, “love bombing” (bombardimi me dashuri) është një shfaqje e tepruar e vëmendjes, dashurisë dhe përkushtimit në një kohë shumë të shkurtër. Personi tjetër mund t’ju mbulojë me komplimente, dhurata, mesazhe të vazhdueshme dhe deklarata të forta ndjenjash që në fillim.

Psikologia Sasha Jackson e përshkruan këtë si një sjellje që synon ta bëjë tjetrin të ndihet i detyruar emocionalisht. Fillimisht, gjithçka duket perfekte, madje mund të mendoni se keni gjetur partnerin ideal. Por me kalimin e kohës, kjo sjellje mund të marrë një drejtim tjetër.

Shenjat që nuk duhet t’i injoroni

Jo çdo marrëdhënie është e njëjtë, por disa sinjale janë të zakonshme:

-Vëmendje e tepërt që në fillim

-Deklarata të mëdha si “do të jemi bashkë përgjithmonë” shumë herët

-Përpjekje për t’ju izoluar nga miqtë dhe familja

-Dhurata të shtrenjta ose gjeste të ekzagjeruara

-Kërkesë për vëmendje të vazhdueshme dhe ekskluzive

-Ndjenjë faji kur nuk përmbushni pritshmëritë e tyre

-Shpesh, këta persona shfrytëzojnë pasiguritë tuaja për t’ju bërë të ndiheni të varur emocionalisht prej tyre.

Pse është kaq i rrezikshëm?

“Love bombing” nuk është thjesht një mënyrë e çuditshme për të treguar dashuri, është një formë manipulimi emocional. Ai bazohet në ndjenjën e reciprocitetit: kur dikush bën shumë për ju, ju ndjeni detyrimin t’ia ktheni.

Problemi? Pasi krijohet kjo varësi, sjellja mund të ndryshojë drastikisht. Personi që më parë dukej ideal mund të bëhet kontrollues, kritik apo edhe abuziv, emocionalisht, verbalisht, madje edhe fizikisht.

Çfarë duhet të bëni?

-Nëse ndjeni se diçka nuk është në rregull:

-Flisni hapur për mënyrën si ju bën të ndiheni kjo sjellje

-Vëzhgoni reagimin e tyre

-Mos injoroni “red flags” vetëm sepse ndiheni të vlerësuar

-Mbani kontakt me njerëzit tuaj të afërt

-Nëse situata bëhet e pasigurt, largohuni dhe kërkoni mbështetje

Jo çdo gjest i madh është dashuri e vërtetë. Ndonjëherë, ajo që duket si “shumë mirë për të qenë e vërtetë”, në fakt është pikërisht kështu.

Të njohësh kufijtë dhe të mbrosh veten është forma më e shëndetshme e dashurisë që mund t’i japësh vetes.