Paturpësia / Paguhen për të sqaruar problemin dhe nuk shkojnë deri në ish-Nish Tulla

DURRËS, 15 nëntor 2013 – “Kush jeni zonja Rome?”, institucione që paguhen për të sqaruar problemet përtojnë të shkojnë deri në Shkozet. Më 18 tetor 2013 “Dyrrah”-u ka botuar lajmin “Durrës. Universiteti e heq nga puna vajzën, ishte rome” (shih:http://www.durreslajm.com/aktualitet/durres-universiteti-e-heq-nga-puna-vajzen-ishte-rome). Aty citohej një grua rome, e intervistuar nga televizioni Vizion plus: “Kam pasur gocën 26 vjeçe që ishte punësuar në universitetin “Aleksandër Moisiu”. Ka punuar vetëm katër muaj dhe ma pushuan nga puna vetëm e vetëm se ishte rome”. Këtë shkrim “Dyrrah”-u ia postoi Avokatit të Popullit. Në adresë të gazetës vjen ky e-mail, që mban datën 15 nëntor 2013:  “Unë quhem Lindita Xhillari dhe z. Totozani më ngarkoi të merrem me ankesën [ka qenë lajm i postuar – “Dyrrah”-u] tuaj të dt. 21.10.2013, lidhur me artikullin për pushimin nga puna të një vajze rome nga Universiteti “Aleksandër Moisiu”, Durrës. Menjëherë ne kërkuam sqarime pranë Rektorit të këtij institucioni dhe në dt. 22.10.2013 [duhet: 12.11.2013 – “Dyrrah”-u] ai na kthen një përgjigje, të cilën po jua bashkëngjis. Lutem nëse dispononi të dhëna të sakta lidhur me emrin apo arsyet ligjore të pushimit të kësaj shtetaseje na rishkruani. Duke ju falënderuar per besimin, Lindita Xhillari, Nd/komisioneve”. Në përgjigjen e rektorit, Prof. Dr. Mit’hat [me drejtshkrim duhet: “Mithat” – “Dyrrah”-u] Mema (shih faksimilen) kërkohet emri i vajzës rome për të sqaruar problemin. Siç shihet, të dy palët nuk “i japin dum”. Kështu, Avokati i Popullit kërkon t’ia gjejë “Dyrrah”-u emrin e vajzës fatkeqe, ndonëse kemi treguar dhe linkun http://vizionplus.al/durres-romet-me-qender-te-re/! Gazeta do ta gjejë, por është turp si për Avokatin e Popullit ashtu dhe për rektorin e universitetit, që nuk tunden nga karriget dhe të shkojnë deri në ish-NISH Tulla të takohen me hallexhinjtë.

/Thanas Mustaqi, agjencia e lajmeve “Dyrrah”/