“Lasgushi u ngarkua në Stamboll”, Shqipëria merr pajisje mbrojtëse nga Turqia për pacientët dhe mjekët

Kryeministri Edi Rama lajmëroi se Shqipëria po merr nga Turqia mjete mbrojtëse për personelin shëndetësor.

Në një status në Facebook, ai bën me dije se aeroplani i ”Air Albania” me emrin ”Lasgushi” ndodhej mbrëmë në Stamboll ku po merrte mjetet mbrojtëse.

Pak ditë më parë Rama kishte kontaktuar me Presidentin turk Erdogan ku ky i fundit i kishte garantuar ndihma në raste nevoje.

“LASGUSHI NË KËTË ÇAST DUKE U NGARKUAR NË STAMBOLL ME ARMË PËR MBROJTJEN E JETËS SË PACIENTËVE DHE MJEKËVE TANË”, shkruan Rama.

Kujtojmë se dje kryeministri Rama ka shpallur gjendjen e fatkeqësisë natyrore në të gjithë territorin e Republikës së Shqipërisë, për shkak të situatës së krijuar nga koronavirusi. Gjendja e Fatkeqësisë Natyrore do të jetë në fuqi për 30 ditë, ndërsa gjatë kësaj periudhe ndalohen tubimet, manifestimet  dhe grevat.