Gjendet e varur në rrethana misterioze Miriam Rivera, ylli i show-t të 2004-s “There’s Something About Miriam” (“Ka diçka rreth Miriam-it”), në fund të të cilit u zbulua se e reja ishte në fakt transgjinore.

Ndonëse modelja meksikane vdiq në shkurt, lajmi në fjalë është shpërndarë me shpejtësi së fundmi, ku bashkëshorti i saj Daniel Cuervo dyshon se e shoqja mund të jetë vrarë për shkak se refuzoi të punonte si prostitutë.

38-vjeçarja u gjend pa jetë në shtëpinë e saj në Hermosillo, Meksikë më 5 shkurt.

“Mëngjesin e 5 shkurtit, Miriam më telefonoi dhe më tregoi se nuk ndihej mirë, po villte gjak, ndaj i thashë të shkonte me shpejtësi në spital. Më telefonoi sërish para se të ikte nga spitali, diku rreth orës 12:00 dhe kjo ishte hera e fundit që folëm”, tregoi bashkëshorti për “Daily Mail Australia”.

Cuervo-n e shtyn të mendojë se e gjitha kjo qe një vrasje pasi gjatë kohës që po merrej me funeralin e Miriam-it mori një telefonatë kërcënuese, ku dikush i tha “të mos kthehej në Meksikë sepse do ta vrisnin edhe atë.”

E ndjera ishte e njohur edhe për pjesëmarrjen e saj në Big Brother Australia.