Ligji antishpifje, Meta: Çdo kokëfortësi s’i shërben çeljes së negociatave, s’do të frikësojë askënd

Presidenti Ilir Meta ka reaguar në lidhje me qëndrimin e Këshillit të Europës, ku ky i fundit i ka kërkuar Kuvendit që të heqë dore nga ligji antishpifje.

Përmes një postimi në ‘Facebook’, kreu i shtetit theksoi se për këtë çështje duhet të reflektohet sa më parë.

Mes të tjerash Meta pohoi se çdo kokëfortësi, jo vetëm që nuk i shërben çeljes së negociatave, por nuk do të frikësojë askënd.

“Duhet reflektuar sa më parë!
Çdo kokëfortësi, jo vetëm që nuk i shërben çeljes së negociatave, por nuk do të frikësojë askënd. Përkundrazi!”,– shkruan Meta.

Stefan Schennach nxit Kuvendin që të heqë dorë nga ky projekt-ligj. “Nxis Kuvendin që të heqë dorë nga ky projekt ligj. Një ligj i tillë mund të ketë ndikim në lirinë e medias. I referohem po ashtu Komisionit të Venecias për lirinë e medias. Edhe “Venecia” deklaron se ligji është i paqartë”, shprehet Schennach. Stefan Schennach shtoi se ndryshimet ligjore rrezikojnë të bëjnë dëm.