Në Hungari ka nisur një lëvizje kundër kandidaturës së Budapestit për organizimin e Lojërave Olimpike të vitit 2024.Sipas medias vendase, nisma është ndërmarrë nga Lëvizja “Momentum”, e cila ka mbledhur mbi 200 mijë firma në një peticion që do të thotë se mund të mbahet edhe një referendum në lidhje me këtë çështje.Budapesti kërkon që të bëhet i pari vend i Europës Lindore që organizon Lojërat Olimpike që pas shembjes së sistemit komunist.
Qeveria hungareze dhe bashkia kanë mbështetur plotësisht këtë kandidaturë, ndërkohë që krejtësisht e kundërta ndodh me popullsinë që duket se vendos jo pak.Në vitin 2015, në Hamburg u mbajt një referendum kundër organizimit të Lojërave Olimpike, rezultati i të cilit detyroi Komitetin organizativ të këtij qyteti që të tërhiqet nga gara. Në të njëjtën kohë, nga gara u tërhoq edhe kandidatura e Romës, kryebashkiakja e së cilës, Virginia Raggi vendosi që të mbajë premtimin e saj elektoral para marrjes së këtij posti.
Në një sondazh të publikuar në fund të muajit janar ne Hungari rezulton se nëse do te mbahet ndonjë referendum, 51.95% e qytetarëve të Budapestit do të votojnë kundër organizimit të Olimpikeve të vitit 2024, shifër kjo shumë më e lartë se ajo e regjistruar në sondazhin e muajit shtator të vitit 2016.Emrat e vendeve kandidate për të organizuar Lojërat Olimpike të vitit 2024 do të mësohen në shtator pas mbledhjes së radhës së Komitetit Olimpik Ndërkombëtar që do të mbahet në Lima të Perusë.
