Një politikan rus, ish-agjent i KGB-së i kërkuar për vrasjen e bujshme të Alexander Litvinenkos në Londër në 2006-n, Andrey Lugovoi u lidh në martesë me një studente sa gjysma e moshës së tij gjatë javës.
Imazhet e martesës, të publikuara në një revistë ruse, tregonin se më shumë se martesa e një “rrogëtari” të shtetit, ajo e Lugovoit ngjante me atë të një multimiliarderi.
Me të ftuar prestigjiozë, në një destinacion piktoresk në Rusi dhe përmes një ceremonie madhështore martesore, 46-vjeçari Lugovoi u betua për të qëndruar deri në vdekje, në të mirë dhe në të keqe përkrah 23-vjeçares Xenia.
Ai tha se nusja e tij nuk kishte "dëgjuar kurrë" për agjentin e vrarë.
E megjithatë, lidhja e tyre, deri sa vdekja t’i ndajë ose jo, me pak gjasa do të konsumohet jashtë Rusisë, përtej së cilës Lugovoi nuk mund të jetë një njeri i lirë, pasi mbi të rëndon një mandat arresti ndërkombëtar.
Ai është njeriu që u ul me ish-agjentin e KGB-së Alexander Litvinenko, kur në çajin e tij u hodh substanca radioaktive polonium-210, e cila solli një vdekje të dhimbshme brenda tre javëve, për këtë të fundit.
Litvinenko, një ish-agjent i KGB-së dhe më pas FSB-së, fitoi strehim politik në Londër në fillim të viteve 2000 dhe bashkëpunoi me autoritetet britanike, duke treguar sekrete të Shërbimeve Sekrete Ruse, disa prej të cilave i demaskoi edhe në media.
Vrasja e tij në 2006-n është interpretuar gjerësisht si një “ndëshkim shembullor” i FSB-së, për të dekurajuar agjentët e saj që të dezertojnë në të ardhmen.
Mandati ndërkombëtar i arrestit për Lugovoin nuk zbatohet në Rusi, ku ai është një politikan i respektuar. Vetë Lugovoi i ka kundërshtuar gjithmonë akuzat për vrasjen e Litvinenkos, duke këmbëngulur se atë e eliminuan vetë Shërbimet Sekrete Britanike.
