Autoritetet nepaleze kanë zbuluar një skandal prej 20 milionë dollarësh që përfshin guidat që helmuan alpinistët që donin të ngjiteshin në malin Everest, me qëllim që të justifikonin transportin ajror dhe të kërkonin kompensim nga kompanitë e sigurimeve.
Policia në Nepal ka akuzuar 32 persona për krim të organizuar dhe mashtrim në lidhje me skemën, ku përfshihen pronarë të kompanive të ecjes në mal, pilotë helikopterësh dhe drejtues spitalesh, raportoi gazeta “Kathmandu Post”.
Sipas hetimit, guidat e përfshira që punonin me kompani që organizonin ture ngjitjeje helmuan alpinistët duke u hedhur sodë buke në ushqim për të shkaktuar probleme gastrointestinale që ngjanin me sëmundjen e lartësisë ose helmimin nga ushqimi.
Pasi alpinistët u sëmurën, ata u detyruan të pranonin transporte ajrore të kushtueshme emergjente me helikopter , ndërsa anëtarët e rrjetit përdorën dokumente të falsifikuara mjekësore dhe fluturimi për të faturuar kostot e kompanive ndërkombëtare të sigurimeve .
Fitimet e paligjshme dyshohet se u ndanë midis guidave, kompanive të helikopterëve, agjencive të udhëtimit dhe spitaleve që ofronin trajtime të rreme.
Hetimi që zbuloi mashtrimin
Hetimi filloi në janar, kur u arrestuan gjashtë drejtues nga tre kompani të mëdha shpëtimi malor. Vetëm një nga kompanitë akuzohet për orkestrimin e 171 nga 1,248 shpëtimeve që deklaroi, duke fituar më shumë se 10 milionë dollarë.
Një e dytë akuzohet për orkestrimin e 75 nga 471 shpëtimeve, duke mbledhur në mënyrë të paligjshme 8 milionë dollarë, ndërsa një e tretë akuzohet për 71 pretendime të rreme me vlerë më shumë se 1 milion dollarë.
Nuk është hera e parë që një skandal i tillë ka goditur industrinë e turizmit të Nepalit, e cila mbështet më shumë se 1 milion vende pune drejtpërdrejt ose tërthorazi, me disa kompani të mëdha ndërkombëtare sigurimi që kanë ndaluar mbulimin e alpinistëve në Nepal vitet e fundit për shkak të një rritjeje të incidenteve të mashtrimit.
Në vitin 2018, qeveria nepaleze tha se kishte eliminuar të gjithë “ndërmjetësit” në operacionet e shpëtimit emergjent, duke i bërë kompanitë përgjegjëse për klientët e tyre gjatë gjithë udhëtimit.
