Prokurorët në Itali pohuan se janë në fazat e hershme të hetimit të një të ashtuquajture “hipotezë krimi” dhe vrasje nga pakujdesia lidhur me mbytjen e jahtit luksoz Bayesian, ku gjetën vdekjen pronari i tij, manjati i teknologjisë Mike Lynch i njohur ndryshe dhe si Bill Gates i Britanisë, vajza e tij 18 vjeçe, si dhe bashkëpunëtorët që e kishin mbrojtur me sukses së fundi në një gjyq federal në Shtetet e Bashkuara ku akuzohej për mashtrim financiar.
Më shumë sesa nga tornadoja në zonë, jahti, sipas hetuesve mund të jetë për shkak të mbushjes me ujë. Nga 22 personat në bord, 15 përfshirë anëtarët e ekuipazhit i shpëtuan mbytjes së varkës. Prokurorët mendojnë se në momentin kur ndodhi tragjedia, viktimat kanë qenë në gjumë.
“Së pari, nuk mund të ketë siguri për sjelljen e të ndjerëve. Por pozicioni në të cilën janë gjetur të shtyn të mendosh se janë përpjekur të shpëtojnë, por nuk kanë mundur“- u shpreh Raffaele Cammarano, zëvendësprokuror i Termini Imerese.
Viktimat, sipas hetuesve, kishin tentuar të gjenin shpëtim duke u mbledhur në anën e majtë të varkës, që nisi të mbushej me ujë, e më pas u anua nga e djathta. Hetimi do të shqyrtojë arsyet përse ekuipazhi shpëtoi dhe arriti të ngjitej në varkën e shpëtimit, ndërsa pasagjerët nuk mundën.
Do të shihet po kështu edhe sesa shpejt mbërritën vërtet në vendngjarje ekipet e shpëtimit. Jahte si “Bayesian-i” kanë nën ujë një bosht që i ndihmon të ruajnë stabilitetin, por që duhet tërhequr për t’iu afruar brigjeve të cekëta. Varka të tilla gjithashtu duhet të kenë nënndarje të papërshkueshme nga uji, të cilat janë projektuar posaçërisht për të parandaluar një fundosje të shpejtë katastrofike, edhe nëse disa pjesë mbushen me ujë.
