Një 28-vjeçar përfundoi në prangat e policisë së Fierit në kuadër të operacionit “Tempulli”.
Shtetasi Begë Çela u kap nga policia ndërsa në çantën e tij kishte doza kokaine me qëllim shitjen në Levan.
Njoftimi:
Si rezultat i kontrolleve të pandërprera, në të gjithë territorin e qarkut, të kryera në kuadër të megaoperacionit policor mbarëkombëtar antidrogë, të koduar “Tempulli”, specialistët e Seksionit për Hetimin e Narkotikëve të DVP Fier, me mbështetjen e informacioneve të siguruara nga inteligjenca policore, kanë konstatuar dhe goditur një tjetër rast në këtë fushë, për të cilin u arrestua në flagrancë shtetasi B. Ç., 28 vjeç, banues në Levan.
Nga kontrolli në çantën që mbante me vete 28-vjeçari, shërbimet e Policisë gjetën një sasi lënde narkotike kokainë, të ndarë në doza të gatshme për shitje. Dozat u sekuestruan në cilësinë e provës materiale, bashkë me një armë të ftohtë (përforcues grushti), që posedohej nga ky shtetas.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
