Eriola Dulaj, 38 vjeçe, nënë e pesë vajzave, më e vogla në gji, ka mbetur e plagosur rëndë si pasojë e dhunës shtazarake  nga bashkëshorti i saj Nazar Mollaymeri. 38-vjeçarja gjendet në një shtrat të spitalit të Traumës, pasi ka dalë nga gjendja e komës. Ngjarja është shënuar në fshatin Moglicë të bashkisë së Maliqit, më 14 mars.

Gruaja ka dalë nga gjendja e komës, dhe ka nisur të rrëfejë torturën që ka përjetuar ndërsa bashkëshorti e qëlloi me qëllim për ta vrarë. “Rreth orës 14:00 më tha eja të shkojmë në fushë për të mbjellë patate. Për të shkuar në arën tonë duhet të kalojmë nëpërmjet pyllit të fshatit. Në pyll fillimisht më dhunoi me lopatë. Më ka qëlluar në kokë e në trup. Një nipi i tij më ka gjetur të mbuluar me gurë. Pasi më qëlloi për të vrarë, më mbuloi me gurë që të mos më gjente njeri. Mendoi se vdiqa, por paskam patur jetën e gjatë për vajzat”, tha mes lotësh 38-vjeçarja për një prej të afërmëve që i qëndron tek koka.

Gruaja pasi është përmendur kërkon vazhdimisht vajzat e saj të cilat kanë mbetur pa prindër në fshatin Moglicë.

Të afërmit thonë se ishte nipi i burrit të saj ai i cili e ka gjetur në mes të pyllit pa ndjenja të mbuluar me gurë që e ka nxjerrë prej andej gruan dhe ka lajmëruar ambulancën e Maliqit. Po i njëjti i afërm ka bërë edhe denoncimin në policinë e Maliqit për dhunën e ushtruar nga Mollaymeri karshi bashkëshortes.

Fillimisht 38-vjeçarja është dërguar në spitalin e Korçës, por mjekët e këtij spitali duke parë gjendjen e saj e kanë dërguar për në spitalin e Traumës. Në spitalin e Traumës gruaja është duke marrë mjekim të specializuar. Gjatë një lidhjeje telefonike, sapo është përmendur,  gruaja tha për “DurrësLajm” se ka merak çfarë po bëhet me pesë vazat e saj që kanë mbetur në fshat.

“E madhja është 13 vjeçe, e vogla është akoma në gji, kam merak kush po kujdeset, kush po u jep për të ngrënë, a për t’u ngrohur. Burri më thanë e ka marrë policia në burg. Kam një motër në Vlorë që do të shkojë t’i marrë fëmijët, por a do ta lejojnë të shkojë, se më thanë që janë mbyllur rrugët. E mjera unë për vajzat” .

Gruaja që sapo është përmendur thotë se nuk do ta falë bashkëshortin. “Më vrau, më qëlloi me lopatë në kokë e në trup. Bën sherr edhe për gjënë më të vogël. Pasi më la në pyll kishte shkuar në shtëpi dhe u kishte thënë vajzave, “Po mamin ku e keni? Ku është gruaja?  Më vrau e më la atje dhe ua fshehu fëmijëve atë që bëri me paramendim të plotë”, thotë ajo.

38-vjeçarja kërkon vetëm drejtësi. “Dua të dënohet për atë që ka bërë. Të marrë dënimin e merituar, sepse mund të kisha vdekur e të lija pesë vajza jetime.  Nuk ka ardhur askush nga policia të më pyesë se si e çfarë ka ngjarë! Ku është policia. Ai që më vrau  një herë mund të më vrasë për herë të dytë!”

“DurrësLajm” u interesua në Drejtorinë e Përgjithshme të Policisë së Shtetit, ku nëndrejtori tha se çështja është hapur dhe hetimi ka nisur nga policia e Korçës. Ilir Proda, nëndrejtori i policisë së Korçës në një komunikim telefonik tha se Nazar Mollaymeri është arrestuar me akuzën për dhunë në familje. “Nuk kemi mundur ta pyesim bashkëshorten sepse ka qenë shumë rëndë, por dosjes hetimore do t’i bashkohet edhe raporti mjeko-ligjor, nëse ka patur apo jo plagosje, të lehtë apo të rëndë me dashje. Të gjitha procedurat janë kryer nga policia e Maliqit”, pohoi Proda.

Gruan në spitalin e Traumës nuk po munden dot ta vizitojnë as prindërit e moshuar që jetojnë në rrethinat e Fierit dhe as motrat e saj, për shkak të kufizimeve që janë vendosur në qarkullim. Ndërkohë që prindërit e Eriola Dules, janë shprehur të gatshëm të marrin e të rrisin mbesat e tyre.

K.H.