Gjatë konferencës së sotme për mediat, Presidenti Ilir Meta tha se bandat në Durrës po blejnë vota për llogari të kryeministrit Rama dhe po terrorizojnë qytetarët.
Kreu i Shtetit akuzoi ish-kryebashkiakun Vangjush Dako, drejtuesin politik të PS-së për qarkun Durrës, Ardian Çelën dhe deputetin Lefter Koka.
Për këtë të fundit, Meta u shpreh se i biri del me pistoletë dhe terrorizon qytetarët që të mos votojnë LSI-në, me porosi të Edi Ramës.
“Dy banda të njohura Vangjush Dako që ble vota, Ard Çela i OSHEE-së që ble vota, dhe i treti që duhet të kishte qenë në burg është Lefter Koka, por SPAK-u nuk ka pasur shumë kohë. Me djalin e tij edhe me bandën e tij që terrorizojnë vajzat, gratë, edhe të gjithë njerëzit e ndershëm të Durrësit që të mos votojnë për LSI-së që e bëri ministër atë, edhe këta ndenjën 8 vite pa punë kur ai ishte ministër, edhe mbajtën mbi supe të gjithë baltën e korrupsionit të Lefter Kokës dhe rrugaçërive të djalit të tij. Që del edhe me pistoletë pa leje edhe vete shtëpi më shpi, bashkë me policë dhe persona në kërkim, e të liruar nga burgu për të blerë vota me porosi të Edi Ramës”, tha presidenti.
