Presidenti Ilir Meta shprehet i tronditur për ndarjen nga jeta të Kasem Hysenbelliut.
Në një status në rrjete sociale, Meta shpreh ngushëllimet për familjen e Hysenbelliut, i cili ndërroi jetë prej Covid-19, teksa prej ditësh ndodhej i shtruar në Turqi duke u kuruar nga virusi vdekjeprurës.
MESAZHI I METËS
Tronditës dhe i pabesueshëm lajmi për humbjen e parakohshme nga jeta të Kasem Hysenbelliu, Presidentit të “Fax News”, kësaj media të lirë, të pavarur e dinjitoze.
Në këto momente të vështira jam pranë nënës, bashkëshortes, fëmijëve, familjarëve, miqve, kolegëve e gazetarëve dhe ju shpreh ngushëllimet më të sinqerta për këtë humbje të pazëvendësueshme.
Solidaritet me të gjithë gazetarët e “Fax News” dhe Faxweb.al, të cilët i inkurajoj të vazhdojnë misionin dhe ëndrrën e lënë përgjysmë nga Presidenti Hysenbelliu, për të ndërtuar një media të lirë, zëri i çdo qytetari në nevojë dhe çdo kauze sociale, zëdhënëse e pakompromis e opinionit publik.
I paharruar kujtimi i Kasem Hysenbelliut!
U prehsh në paqen e merituar!
