TIRANË, 4 korrik 2013 – Kryetari i Lëvizjes Socialiste për Integrim z. Ilir Meta priti sot Ambasadoren e Francës në Shqipëri, znj. Christine Moro. Zyra e shtypit e LSI thekson se Ambasadorja Moro e përgëzoi z. Meta për rezultatin e arritur nga LSI në zgjedhjet e 23 qershorit, duke i uruar suksese në angazhimet e mëtejshme.
Nga ana e tij kreu i LSI u shpreh se pas mesazhit të qartë të qytetarëve shqiptarë për ndryshim, më 23 qershor, është përgjegjësia e qeverisë se rëe për të treguar pjekuri politike duke bashkëpunuar me opozitën dhe shoqërinë civile.
“Është përgjegjësia jonë të tregojmë pjekuri politike dhe modesti duke punuar ngushtë me të gjithë aktorët, opozitën, shoqërinë civile dhe grupet e interesit, në funksion të politikave që sjellin investime e punësim, dhe që i shërbejnë axhendës evropiane të Shqipërisë”, u shpreh Meta teksa theksoi se LSI do vazhdojë të jetë faktor stabiliteti në politikën shqiptare dhe se integrimi evropian, veçanërisht marrja e statusit të vendit kandidat brenda këtij viti, do të jetë prioritet parësor.
Ambasadorja Moro e garantoi Metën për mbështetjen e Francës në këtë proces dhe shprehu vullnetin për thellimin e bashkëpunimit dypalësh në fushat prioritare kyçe.
