Milwaukee Bucks kampionë të NBA për herë të dytë në histori. 50 vjet pas triumfit të parë, Giannis Antetokounmpo me shokë rikthyen në Wisconsin unazën e famshme, pas një sezoni të gjatë që përkundër parashikime nxori në finale pikërisht Bucks përballë Phoenix Suns.
Një sukses me përmbysje për Milwaukee-n, që pësoi dy humbje radhazi në sfidat e para, por më pas mori revanshin në takimet e shtëpisë, ndërsa përballja që bëri diferencën ishte e pesta, në parketin e Suns.
Sa i përket ecurisë së kësaj sfide të gjashtë të serisë, Bucks u duk qartë që në periodën e parë që kërkonin të mbyllnin përfundimisht llogaritë, duke e arritur një rezultat të pjesshëm 29-16.
Gjithsesi, Suns nuk mund të dorëzoheshin kaq lehtë, duke zhvilluar një lojë shumë efikase në mbrojtje, me sulmin e Bucks që realizoi vetëm 13 pikë në periodën e dytë (31-13), teksa pjesa e parë u mbyll +5 për skuadrën nga Arizona, 42-47.
Pikërisht në periodën e tretë del me prepotencë në skenë Giannis Antetokounmpo. Greku shënoi 20 pikë në këtë 12-minutësh, duke i dhënë sërish kryesimin skuadrës së tij.
Suns u përpoqën të reagonin në fillim të periodës së fundit, por Bucks nuk e ulën ritmin dhe nën udhëheqjen e Giannis Antetokounmpos, që dhuroi një nga paraqitjet më të mira në karrierë, triumfuan në fund 105-98.
Plot 50 pikë realizoi në total, Giannis, praktikisht gjysmën e ekipit të tij, si dhe 14 “rebound”, ndërsa Suns nuk u mjaftuan 26 pikët e Chris Paul. Ditë e keqe për Devin Booker, i saktë vetëm në 8 nga 22 tentativat nga fusha.
