Ministria e Mbrojtjes ka informuar sërish lidhur me situatën e krijuar në vend si pasojë e disa vatrave zjarresh.
Mësohet se është bërë e mundur tashmë shuarja e zjarreve në Dukat dhe Gjirin e Gramës, ndërkohë që është shuar edhe zjarri pranë pikës kufitare Rips në fshatin Livadhja, gjë që parqiste rrezik edhe për banesat.
Në përditësimin e të dhënave, Ministria bën me dije se zjarri në fshatin Gjorgos, bashkia Fier, po mbahet nën kontroll, ndërsa ka vijuar puna me helikopterin çek për shuarjen përfundimtare të tij.
Ndërkohën në Kepin e Rodonit, në Durrës është raportuar një vatër zjarri, për të cilën po vijon puna për vënien nën kontroll nga forcat në terren, e cila nuk paraqet rrezikshmëri.
Për sa i përket vatrës së zjarrit në një sipërfaqe me shkurre dhe ferra në malin e Xhyrës, në bashkinë e Librazhdit, Ministria thotë se ai po shuhet nga forcat zjarrfikëse të bashkisë.
Së fundmi, Ministria e Mbrojtjes edhe njëherë tjetër ka deklaruar se situata vijon të paraqitet e vështirë për shkak të terrenit në Majën e Rrunës, në Kukës, ku forcat po punojnë të për mos lejuar përhapjen e flakëve në zonat e banuara.
Njoftimi i plotë:
Eleminohen vatrat e zjarrit në Dukat dhe Gjirin e Gramës. Pas punës së intensifikuar të forcave operacionale dhe helikopterit të ardhur nga Holanda po vijon puna për izolimin e plotë të flakëve në të gjithë sipërfaqen e prekur në Gadishullin e Karaburunit, në qarkun e Vlorës.
Gjithashtu është shuar zjarri pranë pikës kufitare Rips në fshatin Livadhja, në bashkinë Finiq, duke shmangur rrezikun për banesat.
Zjarri në fshatin Gjorgos, njësia administrative Cakran, bashkia Fier po mbahet nën kontroll, ndërsa ka vijuar puna me helikopterin çek për shuarjen përfundimtare të tij
Në Kepin e Rodonit, në Durrës është raportuar një vatër zjarri, për të cilën po vijon puna për vënien nën kontroll nga forcat në terren. Nuk paraqitet rrezikshmëri.
Një vatër zjarri në një sipërfaqe me shkurre dhe ferra është raportuar në malin e Xhyrës, në bashkinë e Librazhdit. Ai po shuhet nga forcat zjarrfikëse të bashkisë.
Zjarri në fshatin Thirrë, njësia administrative Fan, bashkia Mirditë ka vijuar të zgjerojë perimetrin, duke shkaktuar tym në të gjithë kodrën. Forcat po punojnë për të ndërprerë vijën e zjarrit në afërsi të rrugëve të fshatit. Ndërkaq është izoluar plotësisht zjarri në fshatin Munellë-Domgjon, bashkia Mirditë.
Vijon të paraqitet e vështirë ndërhyrja për shkak të terrenit në Majën e Rrunës, në Kukës, ku forcat po punojnë të për mos lejuar përhapjen e flakëve në zonat e banuara. Nën kontroll mbeten flakët në fshatin Klysyrë të bashkisë Tropojë si dhe në Vermosh të Malësisë së Madhe.
