Për herë të parë në Shqipëri do të kryhet instalimi i teknologjisë Next Generation Sequencing, që do të përdoret për përcaktimin e terapive intensive dhe target në hemopatite malinje dhe tumoret pediatrike të rralla.

Këtë e bëri të ditur këtë të premte, më 20 shkurt, Ministrja e Shëndetësisë dhe e Mirëqenies Sociale Evis Sala. Përmes një video mesazhi në Konferencën e IV Shkencore për Sëmundjet e Rralla Gjenetike, Sala theksoi rëndësinë e përmirësimit të diagnostikës, bashkëpunimit, kërkimit shkencor dhe të kujdesit të specializuar për pacientët dhe familjet e tyre.

“Pesë muaj më parë, kur mora detyrën si Ministre e Shëndetësisë dhe Mirëqenies Sociale, vendosa që një nga prioritetet kryesore të punës sime të jetë përmirësimi i diagnostikës.  Dhe kjo merr një vlerë të veçantë sidomos në fushën e sëmundjeve të rralla. Kjo konferencë është një hap i rëndësishëm në këtë drejtim, pasi reflekton nevojën për të integruar inovacionin shkencor, politikat publike dhe praktikat klinike.

Gjatë këtyre viteve kemi arritur disa hapa të rëndësishëm. Që nga viti 2022 kemi ngritur Regjistrin e Sëmundjeve të Rralla, i cili po konsolidohet si bazë për një regjistër kombëtar funksional.

Në vitin 2021, u krijua Laboratori i Citogjenetikës Molekulare, dhe më pas u vendos në funksionim Laboratori i Biologjisë Molekulare, ku realizohen diagnoza molekulare për patologji të shpeshta në popullatën shqiptare.

Një zhvillim strategjik është instalimi i teknologjisë Next Generation Sequencing, që do të përdoret për herë të parë në vend për përcaktimin e terapive intensive dhe target në hemopatite malinje dhe tumoret pediatrike të rralla.”, tha ministrja.

Gjatë fjalës së saj, Sala theksoi se qëllimi është rritja e cilësisë së shërbimeve mjekësore dhe rritja e standardeve në nivel ndërkombëtar.

“Qëllimi ynë është që këto teste të ofrohen në Shqipëri, me cilësi dhe standarde ndërkombëtare. Sëmundjet e rralla kërkojnë një qasje të integruar dhe multidisiplinare. Bashkëpunimi mes specialistësh, integrimi në rrjete europiane dhe partneritetet ndërkombëtare janë çelësi për të garantuar standardet më të larta dhe barazinë në akses për pacientët. Kjo konferencë dëshmon angazhimin e komunitetit tonë profesional për të ndërtuar një sistem më modern, të koordinuar dhe të orientuar drejt rezultateve konkrete.  Çdo hap përpara në diagnostikim dhe trajtim është një hap për dinjitetin, cilësinë e jetës dhe shpresën e familjeve që përballen me një sëmundje të rrallë.”, shtoi ministrja.