Kanë shpërthyer debatet në Britani e jashtë saj, mbi larjen e rrobave, pas deklaratave të Stella Mccartney-t. Stilistja e famshme, e bija e Paul Mccartney-t bëri disa pohime të çuditshme për të përditshmen britanike "Observer", kur tha se nëse nuk të duhet ta lash patjetër diçka, mos e laj.
Stella është sidomos kundër larjes së rrobave në lavatriçe dhe kjo për dy arsye: e para, sepse sipas saj, kështu i zgjtatet jetëgjatësia veshjeve, e dyta për të mbrojtur ambientin.
Ajo rrëfeu se ia kishin bërë këtë sugjerim kur ishte e re dhe punonte pranë rrobaqepësve londineze të Savile Row. Një pjesë e britanikëve i kanë marrë seriozisht pohimet e saj.
“Sa herë lajmë veshjet tona, vëmë në qarkullim në ambient mbi 9 milionë mikrofibra plastike”, tha për BBC Laura Diaz Sanchez e shoqatës ambientaliste holandeze “Plastic Soup Foundation”.
Ajo këshillon që të perdoren mundësisht ilaçe rrobash të lëngshëm, që lëshojnë më pak fibra. Një pjesë e diskutimeve u fokusua tek xhinset, që sipas disa ekspertëve nuk duhen larë fare.
“Nëse ndoten në ndonjë vend, pastrojini aty dhe jo të gjithë pantallonin”, thote Sarah Clayton e organizatës mjedisore Wrap.
Ndërkohë, në anën tjetër të debatit qëndrojnë ata të cilëve iu duket e paimagjinueshme të qëndrosh pa i larë rrobat.
