Komuniteti Mysliman i Shqipërisë (KMSH) ka pranuar përgjegjësinë për moszbatimin e saktë të orarit të faljes së namazit të Fitër Bajramit në Sheshin Skënderbej, duke e kryer atë 15 minuta më herët nga njoftimi zyrtar.
Sipas KMSH-së, kjo situatë ndodhi për herë të parë dhe u shkaktua nga probleme teknike të komunikimit në shesh. Në një reagim në rrjetet sociale, institucioni shprehu keqardhjen dhe siguroi besimtarët se në raste të tilla, namazi mund të falet individualisht ose në familje, ashtu siç ka ndodhur edhe në kohën e Profetit Muhamed (s.a.s).
Gjithashtu, KMSH sqaroi se besimtarët që nuk arritën të falin namazin në kohën e caktuar, mund ta kryejnë atë deri në ditën e dytë të Bajramit, në orarin nga 30 minuta pas lindjes së diellit deri 30 minuta para se të hyjë dreka.
Në fund të deklaratës, KMSH kërkoi mirëkuptimin e besimtarëve dhe uroi të gjithë për Festën e Fitër Bajramit.
