Ndahet nga jeta Doktori nga Durrësi, Arif Vezi në moshën 61-vjeçare.
Dr. Arifi, një figurë e rëndësishme e shërbimit të urgjencës së spitalit të Durrësit dhe një shembull i përkushtimit të palodhur ne shërbim të pacientëve, sot nuk është më mes nesh.
Lajmin e jep Urdhri i Mjekut Durrës, ku përmes një postimi në Facebook, thekson se përgjatë gjithë jetës profesionale, doktori me bluzën e bardhë të tij u bë pjesë jo vetëm e mjekëve profesionistë të qytetit tonë, por edhe e shumë viteve të mbushura me punë e sakrifica të panumërta.
“Dr. Arif Vezi, u lind në vitin 1963.
Përfundoi studimet e larta në Fakultetin e Mjekësisë në vitin 1988 si Mjek i Përgjithshëm, duke e përfunduar me rezultate të shkëlqyera.
Më pas punoi disa vite si mjek familje në Qendrën Shëndetësore të Sukthit.
Dr. Arif Vezi specializimin e fokusoi në fushën e dermatologjisë.
Me të përfunduar specializimin emërohet në urgjencën e spitalit të Durrësit ku vazhdonte te ushtronte profesionin.
Doktor Arif Vezi gjatë gjithë karrierës së tij tregoi profesionalizëm, kulturë, korrektësi, qytetari dhe vlera e virtyte humane që konfiguruan tek secili mjekun e besuar dhe shumë të dashur për çdo pacient.
Përgjatë gjithë jetës profesionale, doktori me bluzën e bardhë të tij u bë pjesë jo vetëm e mjekëve profesionistë të qytetit tonë, por edhe e shumë viteve të mbushura me punë e sakrifica të panumërta.
Duke u shprehur ngushëllimet e përzemërta familjarëve dhe kolegëve, urojmë që shpirti i tij të prehet në paqe!
I paharruar qoftë kujtimi i tij!“, shkruhet në njoftim.
