Ish-basketbollisti Enea Andrea, i cili është edhe vëllai i aktores së njohur, Ema Andrea është ndarë papritur nga jeta.
Lajmin e ka bërë të ditur Federata Shqiptare e Basketbollit, që thotë se 54- vjeçari vdiq si pasojë e një arresti kardiak. Ndërkohë mësohet se ngjarja ka ndodhur teksa ai ishte duke u stërvitur në palestër.
Rreth shtatë vjet më parë, ai kaloi një problem me zemrën, por pas asaj periudhe u rikthye në formën optimale fizike.
“Federata Shqiptare e Basketbollit shpreh dhimbjen e thellë për ndarjen nga jeta të Enea Andrea, ish-basketbollist, i cili u nda nga ne ditën e sotme si pasojë e një arresti kardiak.
Enea do të kujtohet për pasionin, përkushtimin dhe kontributin e tij në basketbollin shqiptar, si dhe për vlerat njerëzore që la pas brenda dhe jashtë fushës së lojës.
Në këtë moment të vështirë, Federata Shqiptare e Basketbollit i shpreh ngushëllimet më të sinqerta familjes, miqve dhe gjithë komunitetit të basketbollit.
U prehsh në paqe, Enea. Kujtimi yt do të mbetet gjithmonë mes nesh”, thuhet ne reagimin e Federatës Shqiptare të Basketbollit.
Enea Andrea ishte një emër i njohur për sportin e basketbollit shqiptar, ku ka luajtur për shumë vite me ekipin e Dinamos dhe duke qenë pjesë e ekipit kombëtar. Pas karrierës si lojtar, ai shquhej për rolin e tij si specialist dhe komentator në transmetimet televizive të basketbollit amerikan NBA, duke u bërë një figurë e njohur edhe në median shqiptare.
