Një 38-vjeçar është arrestuar në Shijak për zjarrvënie.
Mësohet se Myslim Marku 38 vjeç, ndezi zjarr në fshatin Shetel për të djegur shkurret por me përhapjen e flakëve u dogjën 1000 pemë ulliri.
Ndaj Markut rëndon akuza për veprën penale “Shkatërrimi i pronës me zjarr”.
Njoftimi i policisë:
Policia identifikon dhe vë në pranga një shtetas të dyshuar për zjarrvënie.
Nga zjarri që ndezi ky shtetas, në fshatin Shetel, u dogjën një sipërfaqe toke dhe 1000 pemë ulliri.
Si rezultat i hetimeve dhe veprimeve operacionale të menjëhershme, të kryera nga shërbimet e Policisë, me qëllim përcaktimin e autorësisë së zjarrvënieve, u arrestua shtetasi:
-M. M., 38 vjeç, banues në Shetel, Shijak, pasi dyshohet se ka ndezur zjarr, për të djegur disa shkure, dhe si pasojë e përhapjes së flakëve, janë djegur një sipërfaqe toke dhe 1000 pemë ulliri.
Ndërhyrja e menjëhershme e zjarrfikësve dhe shërbimeve të Policisë, mundësoi neutralizimin e flakëve të zjarrit.
Materialet procedurale i kaluan Prokurorisë së Durrësit, për veprime të mëtejshme, për veprën penale “Shkatërrimi i pronës me zjarr”.
Policia e Shtetit apelon për qytetarët që në asnjë rast të mos shkaktojnë zjarr, pasi reagimi i Policisë për arrestimin e autorëve do të jetë i menjëhershëm, konform parashikimeve të Kodit Penal për këtë krim.
