Një incident i pazakontë ka ndodhur në një diskotekë në Prishtinë, ku një përleshje mes pesë vajzave ka përfunduar me arrestime dhe plagosjen e një zyrtareje policore. Ngjarja ka ndodhur të premten mbrëma dhe është raportuar nga Policia e Kosovës në bilancin e saj 24-orësh.
Sipas raportimit, tri vajza kanë denoncuar se janë sulmuar fizikisht nga dy të tjera, gjatë qëndrimit në një diskotekë. Tensionet kanë eskaluar më tej edhe jashtë lokalit, ku të dyshuarat, në përpjekje për t’i shpëtuar policisë, kanë goditur me veturën e tyre një efektive policie.
“Të dyshuarat, duke tentuar t’i shmangen arrestimit me veturën e tyre, kanë goditur zyrtaren policore. Të njëjtat janë arrestuar dhe pas intervistimit me vendim të prokurorit, njëra prej tyre është dërguar në mbajtje, ndërsa e dyshuara tjetër – e mitur, është liruar”, thuhet në njoftimin e policisë.
Për fat të mirë, efektivja e plagosur ndodhet jashtë rrezikut për jetën, ndërsa hetimet për rastin vijojnë.
