Mbrojtja ligjore e te miturve që janë në konflikt me ligjin do të forcohet.
Këtë parashikojnë ndryshimet në “Kodin e Drejtësisë Penale për të Mitur” të publikuar për konsultim publik nga Ministria e Drejtësisë.
Një nga risitë kryesore është detyrimi për praninë e avokatit që në momentin e parë të procedimit, pa mundësi që i mituri të heqë dorë nga kjo e drejtë.
Çdo fëmijë do të përfitojë automatikisht ndihmë juridike falas. Po ashtu, i mituri do të informohet në mënyrë të qartë dhe të kuptueshme për të gjitha të drejtat e tij, ndërsa në proces do të përfshihen prindi, përfaqësuesi ligjor ose një person i besuar.
Projektligji vendos standarde të reja edhe për marrjen në pyetje të të miturve, duke parashikuar regjistrimin audioviziv të pyetjeve, zhvillimin e tyre në ambiente të përshtatura për fëmijë dhe kufizimin e numrit të intervistave për të shmangur një viktimizim të dytë.
Një tjetër element i rëndësishëm është parimi se privimi nga liria do të përdoret vetëm si masë e fundit, për periudhën më të shkurtër të mundshme, duke i dhënë përparsi masave alternative. Gjykatat do të kenë detyrimin të arsyetojë në mënyrë të posaçme çdo vendim për arrest, ndalim apo burgim të të miturve.
Ndryshimet ligjore forcojnë gjithashtu mbrojtjen e fëmijëve viktima dhe dëshmitarë, veçanërisht në rastet e trafikimit dhe shfrytzimit seksual. Projektligji parashikon qartë se fëmijët viktima të këtyre veprave nuk mund të ndëshkohen për veprime kriminale që janë detyruar t’i kryejnë si pasojë e drejtpërdrejtë e shfrytëzimit apo trafikimit
Vëmendje e veçantë i kushtohet edhe mbrojtjes së privatësisë e të dhënave personale të të miturve, duke kufizuar aksesin në informacion dhe ndaluar publikimin e të dhënave që mund të çojnë në identifikimin e tyre
Me këto ndryshime, Shqipëria synon të afrohet më tej me standardet evropiane të drejtësisë për fëmijët dhe të garantojë një sistem penal më të drejtë.
